Ólafur: „hæpið að þetta standist lög og samþykktir sjóðsins“

Í gærkvöldi tók full­trúaráð VR í Lífeyrissjóði verzlunarmanna ákvörðun um að aft­ur­kalla umboð stjórn­ar­mann­anna fjög­urra sem VR skip­ar í stjórn sjóðsins og skipa nýja í þeirra stað. Ástæða þess að VR kaus að grípa til þess­ara aðgerða er sú að þann 24. maí síðastliðinn hækkaði Líf­eyr­is­sjóður verzlunarmanna breyti­lega vexti verðtryggðra sjóðfélagalána úr 2,06 prósentum upp í 2,26 prósent, en tveim­ur dög­um fyrr hafði Seðlabanki Íslands lækkað stýri vexti um hálft pró­sentu­stig.

„Þetta er bara ekki góð staða og hæpið að þetta stand­ist lög og samþykkt­ir sjóðsins,“ seg­ir Ólaf­ur Stephen­sen, fram­kvæmda­stjóri Fé­lags at­vinnu­rek­enda, í samtali við Mbl.is. FA er eitt af fimm sam­tök­um at­vinnu­rek­enda sem skipa í stjórn LV. 

„Það er gert ráð fyr­ir því að stjórn­in sé sjálf­stæð í sín­um störf­um og starfi í þágu sjóðfé­laga. Ég hef ekki séð nein rök fyr­ir því að ákvörðun stjórn­ar­inn­ar gangi gegn hags­mun­um sjóðsins eða sjóðfé­laga. Það eru al­gjör­lega mál­efna­leg rök fyr­ir ákvörðunum sem stjórn­in hef­ur tekið,“ bætir hann við.

Spurður nán­ar út í ákv­arðanir stjórn­ar­inn­ar, seg­ist hann ekki ætla að ræða efn­is­lega hverja ákvörðun stjórn­ar­inn­ar fyr­ir sig.

Ólafur segist ekki vilja ræða efnislega hverja ákvörðun stjórnarinnar fyrir sig. „Til þess erum við með stjórn­ar­mann sem upp­fyll­ir kröf­ur Fjár­mála­eft­ir­lits­ins og er und­ir ströngu aðhaldi og eftirliti. Við ein­fald­lega treyst­um því fólki sem við til­nefn­um í stjórn­ina.“

Hann segir að lokum að FA eigi eft­ir að rýna í stöðuna, en það hefur ekki verið gert þar sem aðalmaður og varamaður sem skipaðir voru í stjórn sjóðsins fyr­ir FA eru í sum­ar­leyfi „Þannig að við höf­um ekki haft tæki­færi til þess að ræða þetta við okk­ar fólk í stjórn­inni.“

Stjórnarformaður LV sagði af sér

Í kjölfar ákvörðunar fulltrúaráðs VR í LV fann Ólafur Reimar Gunnarsson sig knúinn til að segja af sér sem stjórnarformaður sjóðsins. Á sama tíma sagði hann af sér stjórnarmennsku hjá VR og öllum trúnaðarstörfum fyrir félagið.

Í yfirlýsingu sagði hann meðal annars um ákvörðun sína:

„Ég tel […] illa að mér og öðrum stjórnarmönnum sjóðsins vegið að væna okkur um óheilindi og bregðast við með svo harkalegum og ómálefnalegum hætti sem formaður VR og stjórn félagsins hafa gert, og nú síðast fulltrúaráð félagsins í LV. Vinnubrögð formanns og meirihluta stjórnar hafa verið forkastanleg og get ég ekki hugsað mér að starfa lengur í þessum félagsskap og segi því hér með skilið við hann.“