Það var nóg um að vera hjá lögreglunni á Þorláksmessu. Um sex leytið var tilkynnt um umferðaróhapp í hverfi 108, Háaleitis- og Bústaðarhverfi. Í dagbók lögreglu kemur fram að annar ökumaðurinn hafi verið ung ölvuð kona og var hún með ungabarn í bílnum.
Þegar lögreglu bar að var konan að brjóstfæða barnið. Konan var handtekin og vistuð í fangageymslu. Haft var samband við föður barnsins sem sótti barnið.
Þá var konan tilkynnt til Barnaverndar.
Klukkan 00:50 var kona handtekin sem vildi ekki yfirgefa veitingastað og var vísað út. Þegar lögreglukona var að rétta konunni veski hennar og yfirhöfn þá sparkaði konan í lögreglukonu.
Konan var handtekinn og færð á lögreglustöð en látin laus að lokum viðræðum.
Klukkan þrjú síðastliðna nótt var svo tilkynnt um líkamsárás við bar í miðbænum. Í dagbók lögreglu segir:
„Maður kemur úr leigubifreið, ræðst á tvo menn sem þar voru og lemur þá með flösku. Árásarmaðurinn náði að hlaupa á brott. Ekki er vitað um meiðsl árásarþola.“
