Listamaðurinn Odee, eða Oddur Eysteinn Friðriksson, hefur verið sakaður um myndstuld á verkum erlendra listamanna í tengslum við umbúðir sem hann hannaði fyrir Opal sælgætið.
Listamaðurinn Sigmundur Breiðfjörð Þorgeirsson birti pistil á Facebook í gær þar sem hann gagnrýnir verk Odds Eysteins. Sigmundur segir málefnið vera flott en ágóði af sölu Opalsins með umbúðum Odee rennur til samtakanna Einstök börn en það afsaki þó síður en svo myndstuld.
„En að safna að sér vinnu og persónulegum verkum lítið þekktra listamanna. Að segja ekki neinum frá upprunanum. Að vilja græða á vinnu annarra til þess að upphefja sjálfan sig. Koma sér í blöðin. Prenta svo og selja. Viðskipti. Markaðssetning. Snilld. Æði. Grilla á kvöldin. Þetta er slæmt,“ skrifar Sigmundur en segir að lögfræðingar verði þó að skera úr um hvort athæfið sé ólöglegt.
Odee er þekktur fyrir klippimyndir (e. collage) og er verkið á nýja Opalnum af sama meiði. Sigmundur segist bera virðingu fyrir klippimyndum sem miðli og popplist listamanna á borð við Andy Warhol og Roy Lichtenstein. Þá segir hann vel hægt að gera frumleg verk með aðferð klippimynda án þess að misnota verk annarra listamanna.
„Það er alveg hægt að skapa spennandi verk notandi aðferðafræði klippimynda eða "samrunalist". Gaman væri að sjá frá Odd koma með beittari klippimyndir á "vinsællari efni" úr "vinsælli menningu" í staðinn fyrir að nýta sér strit, púl og puð ungra listamanna af netinu.“
Sigmundur segist líta gríðarlega niður á svona hegðun og vonar að fleiri geri það líka. Þá merkir hann Nóa Síríus í færslunni og kallar eftir viðbrögðum Sælgætisframleiðandans. Færslan hefur vakið mikil viðbrögð og hafa fjölmargir listamenn lýst yfir stuðningi sínum og sagst vera sammála Sigmundi.
Einn listamannanna sem Odee er sagður hafa stolið frá, kanadískur listamaður sem kallar sig Atomic DNA, greindi frá málinu á Instagram-síðu sinni.
„Einhver algjör asni @odeeart hefur stolið minni list og sett hana á umbúðir sem hann er að selja á Íslandi. Ef þið kannast við list einhverra annarra á umbúðunum endilega látið þá vita,“ skrifar Atomic DNA.
Þá er haft eftir einum ónefndum listamanni að hann hyggist kæra málið og láta setja lögbann á verk Odee.
Að sögn DV er þetta ekki í fyrsta skipti sem sambærileg mál koma upp hjá Odee. Árið 2014 var greint frá því að honum hefði verið fleygt út af síðunni Devianart fyrir að nýta listsköpun annarra en í kjölfarið rigndi yfir Odee neikvæðum skilaboðum og var hann úthrópaður sem þjófur. Árið 2016 hótuðu svo teiknarar hjá Marvel og Disney honum öllu illu fyrir sambærilegar sakir en þá hafði Odee nýtt verk þeirra í eigið verk sem var sett upp á flugvellinum í Eskifirði á sínum tíma.
Oddur Eysteinn kveðst ekki þurfa að svara fyrir málið enda hafi hann margsinnis endurtekið sömu tugguna í gegnum árin. „Ég vinn verk í klippimyndastíl sem er viðurkennt listform,“ segir hann og bendir á að ef höfundavarið vörumerki sé sett í annað samhengi sé um nýtt sjálfstætt listaverk að ræða. Um slíkt séu fjölmörg dæmi, meðal annars verk Andy Warhol og Marcel Duchamp.
