Tímamót urðu á vinnumarkaði í gær þegar stærstur hluti aðila sem kemur að kjarasamningaborði, eða yfir 70% hans varð sáttur við nýja leið við samningsgerð, áþekkri þeirri sem þekkst hefur á hinum Norðurlöndunum.
Markmið samkomulagsins, sem heildarsamtök launafólks og atvinnurekenda á almennum og opinberum vinnumarkaði skrifuðu undir í dag, er að tryggja varanlega aukningu kaupmáttar á Íslandi á grundvelli lágrar verðbólgu, stöðugs gengis krónunnar og lægri vaxta. Utan hópsins eru meðal annars ríkisstarfsmenn í BHM sem útiloka þó ekki aðkomu að samkomulaginu.
Samkomulagið nær til ársins 2018, en í tilkynningu kemur fram að þar eigi að stöðva svokallað \"höfrungahlaup á vinnumarkaði“ með sameiginlegri launastefnu.
Nýtt samningalíkan gerir ráð fyrir að svigrúm launabreytinga verð skilgreint út frá samkeppnisstöðu gagnvart helstu viðskiptalöndum og munu samningar við útflutningsfyrirtæki móta svigrúm til launabreytinganna.
Þá verður jöfnun í lífeyrisréttindum á almenna og opinbera vinnumarkaðinum, en á móti verður opinberum starfsmönnum tryggð hlutdeild í launaskriði á almennum vinnumarkaði. Þá verða kjarasamningar miðaðir við að auka kaupmátt á grundvelli stöðugs gengis.
