Upplýsingar um aksturskostnað alþingismanna verða birtar á nýrri vefsíðu sem til stendur að búa til, að því er ákveðið var á fundi forsætisnefndar Alþingis í gærdag, en þar var rætt um aksturskostnað í tilefni af háum endurgreiðslum þingsins til Ásmundar Friðrikssonar, þingmanns Sjálfstæðisflokksins.
Að sögn Jóns Þórs Ólafssonar, þingmanns Pírata og 5. varaforseta nefndarinnar, var einnig rætt á fundinum um hvort Ásmundur hafi brotið siðareglur Alþingis með akstrinum, ásamt fleiru sem tengist siðareglunum. Hann bendir á að hver sem er geti sent erindi til forsætisnefndar með rökstuðningi ef honum sýnist að þingmaður fari ekki eftir siðareglum.
\"Forsætisnefnd hefur kallað eftir því að fá greinargerð, eins konar samantekt, frá skrifstofu Alþingis um það hvernig þessum reglum sem forsætisnefnd setti út frá lögum um þingfararkostnað hefur verið framfylgt af skrifstofu Alþingis. Það er okkar lögbundna skylda að fá það á hreint. Þá gæti komið í ljós að lögum hafi ekki verið fylgt, sem ýmislegt bendir til,“ segir Jón Þór við mbl.is í tilefni af fundi forsætisnefndar.
