Stefán Eiríksson, nýr útvarpsstjóri, hafnar því að hann sé fulltrúi stjórnmálaflokks í nýja starfinu. Ýmsar kenningar hafa heyrst um það eftir að tilkynnt var um ráðninguna en Stefán segir í samtali við Fréttablaðið að stjórnin hafi staðið faglega að valinu.
„Ég hef auðvitað heyrt það úr ýmsum áttum að ég sé ýmist handbendi borgarstjóra eða komi úr Sjálfstæðisflokknum eða Framsóknarflokknum eða öðrum flokk. Það eru ýmsar kenningar um hvar ég stend í pólitík,“ segir Stefán. Hann segir að ekki sé litið til þannig þátta.
Sjá einnig: Arnþrúður segist hafa verið í lokahópnum: Sakar stjórn RÚV um spillingu „Æ já, heyrðu, þetta er bitlingur“
„Það sem blasti við mér í þessu ferli var að stjórnin stóð faglega og afar vel að ráðningunni og valdi ekki á pólitískum forsendum. Ég gekk ekki að því sem vísu að fá þessa stöðu ég veit að það voru margir frambærilegir umsækjendur sem höfðu gefið sig fram en ég er afar þakklátur fyrir það traust sem að stjórn RÚV sýnir mér með því að velja mig í þetta verkefni og ánægjulegt að heyra að það hafi verið góð samstaða um þá niðurstöðu í stjórninni.“
Þá mætti Stefán í Kastljós í gær og þar sagði hann sig ekki hlynntan því að RÚV yfirgefi auglýsingamarkaðinn líkt og krafa hefur verið uppi um og komið hefur til álita hjá Lilju Alfreðsdóttur, mennta-og menningarmálaráðherra.
„Ég held að það skipti máli fyrir ríkisútvarpið að miðla, meðal annars því sem almenningur vill miðla í gegnum auglýsingar og tilkynningar en þetta er auðvitað líka tekjugrundvöllur.“
