Fréttablaðið segir í dag frá nýjum Íslendingum á Hvammstanga, brosmildum fjölskyldum sýrlenskra flóttamanna sem komu í vor, tíu fullorðnum og þrettán börnum. Fólkið hefur náð ótrúlegum tökum á erfiðri íslenskunni og flestir fullorðnir hafa fengið vinnu. Þau voru á flótta frá stríði við slæman aðbúnað, kröpp kjör og fordóma.
Þau eiga skilið skilning og stuðning. Þeir sem hafa tekið á móti þeim eiga hrós skilið. Bæði verkefnisstjórar og stuðningsfjölskyldur Sýrlendinganna, en ekki síst heimamenn sem hafa boðið fólkið velkomið í samfélagið. Hinir nýju Húnvetningar segjast hafa upplifað góðar móttökur og notið velvildar. Þeir hafi styrkst og geti nú gefið til baka.
Flóttamenn og innflytjendur eru því miður bitbein stjórnmálamanna hér sem annars staðar. Þar togast á tvennar öfgar: Annars vegar eru þeir sem vilja takmarka mjög fjölda flóttamanna og annarra innflytjenda. Alið er á ótta um að innflytjendur mengi það sem íslenskt er, þeir dragi úr öryggi og sundri samfélaginu. Hins vegar eru þeir sem vilja óheft landamæri. Oft sjáum við gagnrýna orðræðu um illa meðferð stjórnvalda á útlendingum. Sumt þar kann að vera rétt. Kerfi eru aldrei fullkomin og meðalhófið vandratað.
En þrátt fyrir allt er margt gert vel, eins og á Hvammstanga. Sé rétt á málum haldið auðga flóttamenn og aðrir innflytjendur samfélagið, gera það fjölbreyttara og sterkara.
Á fáum stöðum í heiminum eru útlendingar jafn velkomnir og á Íslandi. Í síðustu viku birti Gallup niðurstöður alþjóðlegrar könnunar í 138 löndum um afstöðu til innflytjenda. Þar eru Íslendingar áberandi jákvæðir á heimsvísu gagnvart þeim og hvað opnastir fyrir því að samþykkja þá. Þá er unga fólkið okkar enn víðsýnna og móttækilegra gagnvart innflytjendum.
Á þessu ári hafa Íslendingar boðið 74 flóttamenn velkomna. Þeir búa á höfuðborgarsvæðinu, Selfossi, Blönduósi og á Hvammstanga. Á næstu tveimur árum koma 85 flóttamenn og síðan 100.
Flóttamannastofnun Sameinuðu þjóðanna áætlar fjölda farandfólks í heiminum um 270 milljónir, eða um 3,5 prósent jarðarbúa. Þeim fer fjölgandi, eru um 50 milljónum fleiri en árið 2010.
Þó að margir velji að flytja, eru sífellt fleiri sem flytjast af nauð. Í ársbyrjun fór fjöldi flóttafólks á heimsvísu yfir 70 milljónir: 26 milljónir á flótta yfir landamæri, 3,5 milljónir hælisleitenda og 41 milljón á flótta innan eigin lands. Múrar og lokaðar dyr mæta þeim í vaxandi mæli og mannréttindabrotum fjölgar.
Við fótstall hinnar eirgrænu Frelsisstyttu í New York, er skráð sonnetta Emmu Lazarus frá árinu 1883 um hina máttugu gyðju sem býður menn velkomna. Með þöglum vörum sínum hrópar hún: „Fátækan skarann fær til mín, sem frjálsan þráir anda. Þar sem lampinn skærast skín, skal birtan gullin standa.“
– Það gildir líka á Íslandi.
