Frá og með 1. janúar 2019 taka gildi ný lög um líffæragjafir, þar sem allir Íslendingar verða skráðir sem líffæragjafar nema þeir skrái sig andvíga því. Þetta kemur fram í tilkynningu frá landlækni í gær. Áður höfðu landsmenn þurft að skrá sig sérstaklega sem líffæragjafa.
Eyjan.dv.is var meðal þeirra miðla sem greindu frá því þegar nýju lögin voru samþykkt í sumar. Í umfjöllun Eyjunnar kom fram að með breytingu á lögum um brottnám líffæra yrði framvegis miðað við ætlað samþykki látins einstaklings fremur en ætlaða neitun þegar kæmi að líffæragjöf, nema yfirlýst neitun liggi fyrir. Samkvæmt nefndaráliti velferðarnefndar hafi komið fram að til grundvallar frumvarpinu lægi sú afstaða að eðlilegra væri að gera ráð fyrir því að fólk myndi frekar vilja koma náunga í neyð til hjálpar með því að gefa líffæri og lífræn efni að sér látnum heldur en ekki.
Í tilkynningu landlæknis er eftirfarandi einnig tekið fram: „Með því að gefa líffæri getum við bjargað lífi annarra. Í öðrum tilvikum getum við lengt ævi fólks og bætt heilsu þess og líðan með líffæragjöf. Alls hafa um hundrað manns á Íslandi gefið líffæri frá upphafi og því hafa vel yfir 350 manns notið góðs af þessum gjöfum lífsins því líffæri eins gjafa geta komið allt að sex manns til góða.“
Ekki allir sáttir með nýju lögin
DV.is greinir frá því að ekki séu allir á eitt sáttir við ný lög um líffæragjafir og nefna nokkur dæmi um háværan minnihluta sem er uggandi yfir stöðunni, þar á meðal athugasemdir við frétt Vísis frá miðvikudeginum 26. desember og umræður í Facebook hópnum „Stjórnmálaspjallið.“ Í athugasemdakerfinu og í Facebook hópnum er ríkið t.d. sakað um ótæpilega ríkisafskiptastefnu, fullyrt að læknar geti úrskurðað fólk látið eftir hentisemi og að þeir geti krukkað í fólk án leyfis og hirt úr því það sem það vill, auk þess sem það sé skrítið að þurfa að standa í pappírsstússi vegna einhvers sem fólk vildi ekki fyrir það fyrsta.
