Ólafur sagði í viðtalinu að populískir flokkar á Norðurlöndunum; Svíþjóðardemókratar í Svíþjóð, Framfaraflokkurinn í Noregi, Sannir Finnar í Finnlandi og danski Þjóðarflokkurinn hafi allir náð því að komast yfir 10% fylgi, margir verið með milli 10 til 20% fylgi og í tvö skipti hafi flokkar náð yfir 20% fylgi.
Ólafur segist hafa um það miklar efasemdir að útlendingaandúð sé að aukast, þrátt fyrir að fylgi við slíka flokka aukist og fari í 10 til 20%: \"Það sem ég held að hafi miklu frekar gerst hafi verið að þessi viðhorf voru til staðar. Það var ákveðinn hópur sem var hræddur við þær almennu breytingar sem voru eða hafa verið að eiga sér stað í samfélögum Norðurlanda og reyndar Evrópu á undanförnum áratugum og það að svona flokkar komi fram þarf í raun alls ekki að vera styrkleikamerki fyrir viðhorf af þessu tagi. Það getur verið veikleikamerki, í þeim skilningi að sá hópur sem aðhyllist hugmyndir af þessu tagi finnst meirihlutinn vera að sækja að sér. Þessvegna sé meiri nauðsyn heldur en nokkru sinni fyrr að skipuleggja sig og reyna að andæfa þeim tímans þunga nið sem að almennt einkennir þjóðfélagsbreytingar í þessum löndum,“ sagði prófessorinn í samtali við Óðinn Jónsson á Rás 1 í morgun og bætti því við að þessier flokkar reyni að efla þessar skoðanir sem þeir standa fyrir en varasamt sé að ýkja mikilvægi þeirra.
