Nokkrir af fyrrum félögum Katrínar Jakobsdóttur forsætisráðherra hættu að ræða við hana eftir stjórnarmyndun Vinstri grænna, Sjálfstæðismanna og Framsóknar og hafa enn ekki rætt við hana.
Þetta kom fram í þættinum Ísland vaknar á útvarpsstöðinni K 100 í morgun, en hann hóf göngu sína í bítið í umsjá Loga Bergmanns Eiðssonar, Friðriku Hjördísar Geirsdóttur og Rúnars Freys Gíslasonar.
Katrín kvaðst þó eiga von á því að einhverjir félaganna ættu eftir að koma til baka þegar fram liðu stundir, en sagði jafnframt að sá háttur innan flokksins að tala beint út, sem oft komi fram sem mikill órói, þýði að hún hafi ekki áhyggjur að fólk stingi hana í bakið: \"Fólk er mjög direct,“ sagði hún í viðtalinu á K100 í morgun.
Níutíu dagar eru frá því hún tók við embætti forsætisráðherra og var hún í viðtalinu spurð út í næstu 90 daga. Var meðal annars bent á að fréttir síðustu daga og vikna bentu til þess að hagvöxtur væri aðeins á niðurleið. Sagði Katrín að ef hagvöxtur væri á niðurleið þýddi það að í dag væri fín tímasetning fyrir hið opinbera til að ráðast í fjárfreka uppbyggingu sem rætt hafi verið um.
Í viðtalinu kom einnig fram að Katrín hefði upphaflega ekki ætlað sér að verða stjórnmálamaður. Bræður hennar hefðu til að mynda báðir verið mun áhugasamari um pólitík meðan hún hafi ætlað að vera bóhem eða „frjáls vera.“ Sagði hún að áður fyrr hafi henni einfaldlega ekki þótt stjórnmálafólk spennandi.
Spurð um áhuga fjölskyldunnar á pólitík sagði hún eiginmann sinn hafa mjög mikinn áhuga á pólitík og stundum hafi mikið gengið á í pólitískum átökum á heimilinu. Hún sagði það þó líklega erfiðari stöðu ef maki stjórnmálafólks hefði engan áhuga á stjórnmálum meðan líf hins væri undirtekið því málefni, að því er fram kemur í frétt mbl.is um málið í morgun.
