Mikill fjöldi fólks sem er að leggja lokahönd á jólainnkaupin hefur lagt leið sína í Kringluna í dag og síðustu dag. Í gær komu um 35 þúsund manns í verslunarmiðstöðina og gert er ráð fyrir á bilinu 38 til 40 þúsund manns hvorn dag í dag og á morgun. Þetta segir Sigurjón Örn Þórsson, framkvæmdastjóri Kringlunnar, í samtali við mbl.is. Þetta þýðir að einn af hverjum níu landsmönnum sé líklegur til að koma við í Kringlunni í dag, en landsmenn eru rúmlega 355 þúsund.
Hann segir jólaverslunina almennt hafa gengið vel og leggist vel í kaupmenn. Segir hann bæði aðsókn og viðbrögð kaupmanna vera á þá leið að búast megi við svipaðri eða aðeins betri sölu í ár en í fyrra.
Þorláksmessa og laugardagurinn fyrir Þorláksmessu eru stærstu verslunardagar jólaverslunarinnar og þar með með stærstu verslunardögum ársins. Í ár eru þessir dagar í röð og því nóg að gera þessa helgi að sögn Sigurjóns.
Þrátt fyrir auknar vinsældir netverslunar segir Sigurjón að ekki megi merkja neinn samdrátt, hvorki í aðsókn eða veltu, núna fyrir jólin vegna þess.
Nánar á
https://www.mbl.is/frettir/innlent/2018/12/22/niundi_hver_landsmadur_i_kringluna_i_dag/
