Nú er talið fullvíst að náttúrupassi ferðamálaráðherra dagar uppi í meðförum atvinnuvegnanefndar að því er heimildir Hringbrautar herma. Rík og breið andstaða við þessa gjaldtökuleið ráðherra er á meðal velflestra þeirra hagsmunasamtaka sem hafa komið fyrir nefndina - og þar fyrir utan er talið að passinn njóti einfaldlega ekki meirihlutafylgis á Alþingi. Líklegt er talið að atvinnuveganefnd leggi sjálf til aðrar leiðir við að innheimta nauðsynlegt gjald af ferðamönnum svo hægt verði að virkja straumþunga erlends ferðafólks til Íslands á öllum árstímum.
Frumvarp Ragnheiðar Elínar Árnadóttur ferðamálaráðherra var lagt fram í desember á síðasta ári, en markmið þess er að afla nægjanlegs fjármagns til að stórauka nauðsynlega uppbyggingu, viðhald og verndun á ferðamannastöðum og efla um leið öryggismál ferðamanna. Gert var ráð fyrir að náttúrupassinn tæki gildi 1. september 2015 og að áætlaðar tekjur fyrstu þrjú árin af honum næmu um 4,5-5,2 milljörðum króna, en um 85% af þeim tekjum kæmu frá erlendum ferðamönnum.
Gagnrýnendur frumvarpsins telja þá leið sem frumvarpið gerir ráð fyrir í innheimtu ekki einasta vera óskilvirka heldur brjóta á almannarétti og breyta verulegri þeirri ásýnd sem íslensk náttúra hefur; 80% erlendra ferðamanna komi til Íslands vegna náttúrunnar af því að hún er ósnortin, full kyrrðar og friðar, en allt eftirlit með passanum muni trufla þessa ímynd og jafnvel gera út af við hana.
