Nasa gerði full til mikið úr þeirri uppgötvun sem kynnt var í gær um að vatn væri að finna á riekistjörnunni Mars, þótt vissulega sé um merkilega uppgötvun að ræða.
Þetta segir Sævar Helgi Bragason, formaður Stjörnuskoðunarfélags Seltjarnarness í samtali við mbl.is í dag, en hann hefur undanfarin ár fylgst vel með því sem fram hefur komið í tengslum við vatn og rauðu reikistjörnuna Mars.
Vísindamenn NASA sögðust í gær hafa fundið vísbendingar um að vatn fljóti niður hlíðar gljúfra og gíga á yfirborði stjörnunnar yfir sumarmánuðina þar þegar hiti þar getur komist yfir 30 gráður á Celsíus, en hann fer vanalega undir 200 gráður á Celsíus á veturna. Þeir segja að uppgötvunin auki möguleikana á því að reikistjarnan gæti hýst einhverja tegund af lífi. Uppspretta vatnsins er þó enn sem komið er óþekkt.
Sævar segir við mbl.is að málið snúist ekki um líf á plánetunni, eins og margir hafi viljað slengja fram eftir framsetningu Nasa, heldur sé þetta um saltvatn sem renni niður brattar brekkur á plánetunni, svokallaðar síendurteknar hliðarrákir.
Í frétt vefjarins segir að menn hafi fyrst orðið varið við vatn á Mars árið 2008 þegar Pheonix geimfarið lenti norðan heimskautabaugs á Mars. Átti þá að sannreyna fyrri uppgötvun um að vetni væri í efstu jarðlögum plánetunnar. Sævar segir að strax og Pheonix hafi lent hafi sést dropi myndast við fót geimfarsins.
Árið 2011 hafi svo HiRISE myndavélarinnar í Mars Reconnaissance Orbite könnunarfarinu fundið merki um síendurteknar hlíðarrásir og tilkynningin í dag hafi í raun verið staðfesting á þeim fundi.
