Aukning varð á fjölda smásilunga í Mývatni árið 2015 og er meira er af stærri bleikju í Mývatni samkvæmt rannsóknarveiðum en undanfarin 30 ár.
Þetta kemur fram í nýrri skýrslu sem nefnist „Silungurinn í Mývatni - Yfirlit yfir rannsóknir og veiðitölur 1986 – 2015“ eftir Guðna Guðbergsson líffræðing. Rannsóknir eru unnar upp að hluta upp úr veiðiskýrslum Mývetninga og í samvinnu við Rannsóknastöðina við Mývatn.
Í skýrslunni segir að á árunum 2011-2015 hafi miklar takmarkanir orðið á veiði í Mývatni samkvæmt nýtingaráætlun Veiðifélags Mývatns sem staðfest hefur verið af Fiskistofu. Kvóti er á netalögnum og stærð möskva er ætlað að hlífa minni silungi. Vetrarveiði í almenningi hefur einungis verið heimiluð frá 1. – 15. mars en eftir þann tíma er bleikja friðuð. Urriðaveiði er heimil í eigin landhelgi með takmörkunum til 31. ágúst ár hvert.
Samkvæmt veiðiskýrslum var heildarveiðin í Mývatni 2015 1.528 silungur. Af þeim voru 716 bleikjur og 812 urriðar. Í vetrarveiði í mars veiddust 537 bleikjur og 64 urriðar. Á þeim tíma sem bleikjuveiði var óheimil voru skráðar 137 bleikjur sem meðafli í urriðaveiðinni.
„Í rannsóknaveiðum haustið 2015 kom fram aukning í fjölda smásilungs og einnig kom meira fram af stærri bleikju á tveimur síðustu árum en áður eru dæmi í rannsóknarveiðum á síðustu 30 árum. Vegna minni sóknar með veiðitakmörkunum eru merki um að hrygningarstofn bleikju hafi stækkað og meira er af bleikju sem áður hefur hrygnt. Sá smásilungur sem veiddist var mest tveggja ára og 17 – 20 cm en bleikjan verður kynþroska 4- 5 ár og þá 40 – 50 cm. Ljóst er því að uppbygging stofnsins mun enn taka nokkur ár,“ segir í skýrslunni en dræm silungsveiði síðari ára og athuganir á lífríki Mývatns hafa mjög verið í fréttum síðari misseri.
Mikilvægt er að áfram verði mjög takmörkuð sókn í bleikju í Mývatni, að því er fram kemur í skýrslunni. Þá segir að afli urriða á sóknareiningu hafi lækkað í Syðriflóa en ekki í Ytriflóa. Stofn hornsíla í vatninu hefur verið veikur en þau eru aðalfæða urriða og samband milli hornsílastofns og viðgangs urriða er óumdeild samkvæmt skýrslunni sem kynnt verður á aðalfundi í Veiðifélagi Mývatns í kvöld. Rökin fyrir veiðinni síðari ár hafa verið menningarbundin, að hlunnindi felist í að „veiða í soðið“ en ekki er um atvinnuhagsmuni að ræða líkt og var þegar yfir 100.000 silungar veiddust árlega í þessum fyrrum gjöfula veiðivatni, sem skýrslur og gögn sýna þó að hefur verið mjög dyntótt í áranna rás og hafa jarðhræringar, iðnaður og ofveiði verið nefnd sem hugsanlegar skýringar.
