Starfsmenn Hagkaupa hentu á dögunum rúmlega 300 innfluttum ostum. Umhverfisverndarsinninn Davíð Hörgdal vakti athygli á þessu á Facebook nú á dögunum. Sigurður Reynaldsson, framkvæmdastjóri Hagkaupa, segir í samtali við mbl.is að forsvarsmenn Hagkaupa skammist sín vegna málsins.
„Við skömmumst okkar fyrir að sjá svona myndir og erum svekkt út í sjálfa okkur fyrir þetta. Við notum þetta til að gyrða okkur í brók og teljum okkur verða að gera betur en þetta,” segir Sigurður. Farið verði yfir stöðu mála vegna þessa hjá fyrirtækinu í dag.
„Mér finnst verst að í hverju oststykki er brjálæðislega mikil orka sem hefur farið í að framleiða það. Það er fáránlegt að henda því,” er ennfremur haft eftir Davíð á mbl.is. Sigurður segir að starfsmaður Hagkaupa fylgist með dagsetningum í hverri verslun til að lágmarka slíkt tjón.
„Öll rýrnun er eitthvað sem við viljum ekki sjá. Kaupmenn reyna ekki að flytja inn til landsins vörur frá Frakklandi til þess eins að henda þeim í gáma. Það kemur verst við okkur sjálfa. Okkar daglega barátta gengur út á að minnka alla rýrnun sama hvar hún er í kerfinu því það hjálpar okkur í rekstri fyrirtækjanna,“ segir Sigurður.
Davíð vonast til að sjá fleiri stunda svokallaðað gámagrans. „Með því að fara einu sinni í viku sparast þúsundir. Það væri gaman að sjá fleiri skella sér, fá sér ennisljós, hanska og poka og kíkja á verðmætin sem annars er sóað,“ segir hann.
