Sminka Hringbrautar, Maríanna Pálsdóttir, tók þessa skemmtilegu mynd af Katrínu Jakobsdóttur, forsætisráðherra, og Sigmundi Davíð Gunnlaugssyni, fyrrverandi forsætisráðherra, þegar þau mættust á setti Hringbrautar.
Katrín og Sigmundur munu ræða saman þjóðfélagsmálin í þættinum Pólitík með Páli Magnússyni sem er á dagskrá Hringbrautar kl. 19:30 í kvöld.
Formaður Vinstri grænna og formaður Miðflokksins fóru um víðan völl í spjalli sínu og ræddu til að mynda heilbrigðismálin sem líklegt er að muni skipta sköpum í komandi kosningum.
Sigmundur, sem hefur verið mjög gagnrýninn á framgöngu ríkisstjórnarinnar í Covid faraldrinum, gekk svo langt að bera heilbrigðisyfirvöld saman við Martein Mosdal, eina frægustu persónu Ladda.
Ekki fylgir sögunni hvað það var sem fékk stjórnmálamennina tvo til að sýna svo ólík viðbrögð og verða áhugasamir lesendur sennilega að horfa á þáttinn til að fá svar við því.
Glöggir lesendur munu kannski reka augun í að svipirnir á Kötu og Simma minna einna helst á leikhúsgrímurnar frægu sem notaðar voru við leiksýningar í Grikklandi til forna, þar sem önnur táknaði tragedíu og hin táknaði kómedíu. Þá vilja nú sumir einmitt meina að pólitíkin sé hálfgert leikhús, eða hvað?
