Þorsteinn Pálsson, fyrrverandi forsætisráðherra fagnar þeirri einingu sem blasir við á Alþingi um viðbrögðin við óhæfuverkunum í París á föstudagskvöld, en segir þó forsætisráðherra og Morgunblaðið skera sig úr.
Í nýjasta pistli sínum á hringbraut.is skrifar Þorsteinn: \"Forsætisráðherrann lætur að því liggja að Ísland eigi að segja sig úr Schengen samstarfi Evrópuríkjanna nú þegar vegið er að grunngildum þess. Morgunblaðið talar tæpitungulaust um að þetta tækifæri skuli strax nýtt í þeim tilgangi.\"
Hann segir að í þess ljósi sé yfirveguð afstaða innanríkisráðherra og utanríkisráðherra sérstakt fagnaðarefni: \"Þeir hafa tekið ábyrga forystu um viðbrögð Íslands og framhald Schengensamstarfsins. Og annað verður ekki ráðið af þingumræðunum en stjórnarandstaðan fylgi svipaðri línu.\"
Hann minnir á að ríki íslams sé ekki þjóðríki. Þessi öflugustu hryðjuverkasamtök okkar tíma ráði samt yfir umtalsverðum landsvæðum og hafi mikil fjárráð. Herverk þeirra í Arabaheiminum, gagnvart Rússlandi og í Evrópu séu af þeirri stærðargráðu að þeim þurfi að mæta af mikilli festu og reyndar með margvíslegu móti.
\"Viðbrögðin hér heima eins og annars staðar,\" skrifar Þorsteinn \"hafa einkum lotið að þremur viðfangsefnum: Í fyrsta lagi í hversu ríkum mæli beita eigi valdi lögreglu og herafla til að draga úr hættunni og uppræta hryðjuverkasamtökin. Í öðru lagi hvernig finna megi pólitíska lausn á stríðinu í Sýrlandi. Í þriðja lagi hvort hryðjuverkin gefi tilefni til að breyta afstöðunni til flóttamannavandans og samstarfs Evrópuþjóðanna.\"
Þorsteinn segir að Íslendingar þurfi að líta á þessar spurningar frá íslensku sjónarhorni: \"Innanríkisráðherra og ríkislögreglustjóri telja ekki að þessir atburðir auki hryðjuverkahættu hér. Þó að efla þurfi löggæsluna á þessu sviði vegna þeirrar stöðu sem var þegar fyrir hendi virðist að svo stöddu ekki þörf á ríkari aðgerðum en þeim. Þetta er trúverðugt mat,\" skrifar hinn reynslumikli og virti stjórnmálamaður til áratuga.
Og hann bætir við í þessum nýja pistli sínum: \"Innanríkisráðherra hefur ítrekað að Ísland eigi að halda áfram Schengenaðildinni en til þess geti komið að herða verði landamæraeftirlit í samstarfi við aðildarríkin. Frakkar hafa þegar farið fram á slíkt fyrst og fremst á ytri landamærunum. Líklegt er að til þess komi. Það gæti jafnvel tekið til innri landamæra milli aðildarríkjanna. Hér hefur ráðherra augljóslega brugðist við af raunsæi.\"
