Við heyrum frásögn þriggja mæðra sem misstu allar unga syni sína. Þær Þóranna M. Sigurbergsdóttir, Vera Björk Einarsdóttir og Oddný Þ. Garðarsdóttir hafa allar misst syni sína á sviplegan hátt og mæta til Lindu Blöndal í Þjóðbraut og segja frá nýútkominni bók sinni, MÓÐIR -MISSIR - MÁTTUR
Árni Garðar Hjaltason var 4ra ára þegar hann lést í bílslysi 1992, Erling Geir Yngvason dó sex ára vegna bráðasýkingar af völdum heilahimnubólgu árið 2000 og Sigurjón Steingrímsson lést 17 ára í bílslysi á Reykjanesbraut árið 1996. Þóranna fæddi einnig andvana stúlku og missti á tíma bókaskrifanna annan son sinn. Ríkharður Örn Steingrímsson varð bráðkvaddur í fyrra, aðeins fertugur að aldri.
Jón Gunnarsson þingmaður Sjálfstæðisflokksins og Þorsteinn Víglundsson, þingmaður Viðreisnar koma við í þættinum en þingsetning er í dag.
Niðurstöður starfshóps um nýliðun og bætt starfsumhverfi grunnskólakennara í Reykjavík voru kynntar í dag. Vinnan byggir meðal annars á ítarlegri rýnivinnu með kennurum sjálfum um allt land, hvað þeir leggja til að bæta verði. Um 627 milljónum verður varið í að hrinda fyrstu framkvæmdum af stað til viðbótarþeim 670 milljónum sem varið var í ár til að bæta stöðu skólanna.
Skúli Helgason, formaður skóla- og frístundaráðs Reykjavíkur og Rósa Ingvarsdóttir, fulltrúi Kennarafélags Reykjavíkur í hópnum mæta á Þjóðbraut til Lindu Blöndal. Mikill kennaraskortur er yfirvofandi næsta áratuginn en innritun í kennaranám við HÍ hefur dregist saman um 75 prósent frá 2002.
