Herbergjanýting á hótelum á höfuðborgarsvæðinu í apríl nam 65,7% og hefur hún ekki mælst minni í apríl síðan 2011. Til samanburðar var nýtingin 79,7% á síðasta ári. Það sem af er ári hefur herbergjanýtingin verið verri en á sömu tímapunktum í fyrra. Raunar þarf að fara aftur til áranna 2015 og 2016 til að finna verri herbergjanýtingu en á fyrstu þremur mánuðum ársins. Fyrir janúarmánuð þarf að fara aftur til ársins 2016 til að finna verri nýtingu en aftur til ársins 2015 til að finna verri nýtingu fyrir febrúar og mars. Að fara þurfi allt aftur til ársins 2011 til að finna verri nýtingu eru því nokkur tíðindi.
Þetta kemur fram í samantekt hagfræðideildar Landsbankans sem birt er í dag og sjá má hér í heild sinni.
Sé litið til annarra landsvæða var nýtingin nú í apríl einnig verri en verið hefur á allra síðustu árum. Ekki þarf þó að fara nándar jafn langt aftur eins og í tilfelli höfuðborgarsvæðisins. Þar sem fara þurfti skemmst aftur voru Suðurnes en þar var nýtingin einungis betri á síðasta ári. Fara þurfti aftur til ársins 2016 til að finna verri nýtingu á Suðurlandi, Vesturlandi og Vestfjörðum.
Á Norðurlandi og Austurlandi þarf að fara aftur til ársins 2015 til að finna verri nýtingu. Þrátt fyrir að nýtingin í apríl hafi minnkað verulega frá því í fyrra á höfuðborgarsvæðinu var nýtingin nú í apríl samt sem áður sú hæsta á landinu. Næsthæsta nýtingin var á Suðurnesjum, 57,8%, en þar á eftir á Suðurlandi, eða 46,2%. Nýtingin var verst á Austurlandi, eða 22%.
