Ekki hafa fleiri konur og börn dvalist í Kvennaathvarfinu í tvo áratugi, að því er fram kemur í samantekt þess um reksturinn á síðasta ári, en hún var kunngjörð í morgun.
Árið 2017 dvöldu 149 konur og 103 börn í Kvennaathvarfinu og hefur fjöldi íbúa á einu ári ekki verið svo mikill í rúmlega 20 ár. Konur og börn dvöldu í athvarfinu í allt frá einum degi upp í 323 daga. Að meðaltali dvöldu konur í 35 daga í senn en meðaldvöl barna var 41 dagur. Auk kvennanna 149 sem dvöldu í athvarfinu á árunu komu 257 konur viðtöl án þess að til dvalar kæmi. Samtals komu því 406 konur í athvarfið í viðtöl eða dvöl á árinu. Þá eru ótaldar konur sem leituðu ráðgjafar og stuðnings í síma athvarfsins sem og þær sem hittu ráðgjafa frá athvarfinu í Bjarkarhlíð, miðstöð fyrir þolendur ofbeldis en þar veita ráðgjafar athvarfsins ráðgjöf.
Konur og börn dvöldu í athvarfinu í allt frá einum degi upp í 323 daga. Að meðaltali dvöldu konur í 35 daga í senn en meðaldvöl barna var 41 dagur. Konurnar sem komu í athvarfið voru á aldrinum 17 til 77 ára, meðalaldur 37 ár. Börn í dvöl voru frá nokkurra daga gömlum til 17 ára.
67% kvennanna sem komu í viðtöl árið 2017 eru Íslendingar en þriðjungur af erlendum uppruna. En þegar uppruni þeirra sem komu í dvöl er skoðaður kemur í ljós að Eins og fyrri ár eru rúmlega helmingur dvalarkvenna (54%) af erlendum uppruna.
83% kvennanna sem komu í dvöl eða viðtöl í athvarfið eru af höfuðborgarsvæðinu (flestar úr Reykjavík eða 55%). Hlutfall kvenna í viðtölum sem koma af höfuðborgarsvæðinu er heldur hærra (84%) en hlutfall dvalarkvenna af höfuðborgarsvæðinu (76%). Í báðum hópum eru þó hlutfallslega of fáar konur af landsbyggðinni þegar horft er til þess að Kvennaathvarfið er eina athvarfið sinnar tegundar á Íslandi.
