„Þetta snýst ekki bara um tölvur og síma. Innan tíðar byrjum við daginn með því að tala til ísskápsins. Þetta er veruleiki okkar tíma. Spurningin er bara þessi: Hvaða mál skilur ísskápurinn? Skilji snjallbúnaður heimilistækjanna ekki íslensku hættum við einfaldlega að tala hana í önn dagsins,“ segir Þorsteinn Pálsson, fyrrum forsætisráðherra í nýjum pistli á Hringbraut. Bjarni Benediktsson fjármálaráðherra gerði íslenskuna og þessi mál að umfjöllunarefni í ræðu um helgina.
Þorsteinn segir mikilvægt að ræða stöðu íslenskunnar og hrósar stjórnmálamönnum sem í ræðum m.a. á landsfundum um helgina hafa varið íslenskuna. Hann segir að tími snjalltækjanna og sú tunga sem snjalltækin skilji kunni að verða íslenskunni banabiti – ef tækin skilja ekki íslensku.
„Fari svo að ný kynslóð Íslendinga tali ensku við heimilistækin er stutt í að meirihluti Íslendinga tali íslensku helst við hátíðleg tækifæri. Við höfum þrjú til fimm ár til að koma í veg fyrir að framtíðin verði þannig.“
Þorsteinn segir verkefnið að leiða saman sérfræðinga í tungumálinu og tölvutækninni til þess að hanna hugbúnað sem geri heimilistækjunum kleift að skilja íslensku. „Verkefnið kostar um það bil einn og hálfan milljarð króna. Þar stendur hnífurinn í kúnni. Við höfum þekkinguna en ekki peningana.“
Þorsteinn bætir við: „Það væri verðugt verkefni fyrir fyrirtækin í landinu að leggja fram á næstu þremur til fimm árum verulegan hluta þessara fjármuna sem þarf til að gefa íslenskunni tækifæri. En ríkisvaldið verður að leggja sitt af mörkum og fara fyrir verkefninu.“
