Meira en tvöfalt dýrara er að æfa handbolta með því félagsliði sem innheimtir minnst fyrir æfingarnar og þess sem tekur mest fyrir þær, að því er fram kemur í nýrri verðkönnun verðlkagseftirlits Alþýðusambands Íslands.
Mestur verðmunur í samanburðinum er á mánaðargjaldinu fyrir 4. flokk eða 119%. Öll félögin bjóða upp á æfingar fyrir 8. flokk (6 og 7 ára) en dýrasta mánaðargjaldið er 6.883 kr. hjá ÍBV en ódýrasta gjaldið er 3.182 kr. hjá HK sem er 3.702 kr. verðmunur eða 116%.
Í 6. flokki (10 og 11 ára) er dýrasta mánaðargjaldið 8.250 kr. hjá Fjölni og ÍR en ódýrasta gjaldið er 4.000 kr. hjá Umf. Selfoss sem er 4.250 kr. verðmunur eða 106%.
Dýrast er að æfa í 4. flokki (15 og 16 ára). Í þeim flokki er dýrasta mánaðargjaldið 12.500 kr. hjá Fjölni en ódýrasta gjaldið er 5.700 kr. hjá Val sem er 6.800 kr. verðmunur eða 119%.
