Eimur nefnist metnaðarfullt verkefni sem snýr að betri nýtingu jarðhita. Markmiðið með verkefninu er betri nýting orkuauðlinda og aukin nýsköpun í orkumálum á Norðurlandi eystra á hinu svonefnda Eyþingssvæði, sem samanstendur af Húsavíkursvæðinu, Norðausturhorninu og Akureyrarsvæðinu.
„Tilgangurinn er fyrst og fremst að ná sameiginlega utan um þessi tækifæri sem eru hér í jarðhitanum á Norðausturlandi. Þá komu sveitarfélögin og orkufyrirtækin saman og settu þetta verkefni á stofn, svona til þess að kortleggja tækifærin og finna leiðir til þess að nýta þau enn betur.“ segir Snæbjörn Sigurðarson, framkvæmdastjóri Eims. Hann segir verkefnið hafa hafist sumarið 2016 og þá hafi það verið sett til þriggja ára. Hafa stofnaðilar lagt verkefninu til hundrað milljónir króna.
Að Eim standa Landsvirkjun, Norðurorka, Orkuveita Húsavíkur og Eyþing, samband sveitarfélaga í Eyjafirði og Þingeyjarsýslum. Auk þess eru Íslenski jarðvarmaklasinn og Íslenski ferðaklasinn með í verkefninu ásamt atvinnuþróunarfélögum á svæðinu.
Jarðhitinn er verðmætur og á Norðausturlandi sparar hann heimilum um átta milljarða á ári í húshitunarkostnað. Jarðhitinn á Norðausturlandi er því mikilvæg náttúruauðlind sem hefur aukið lífsgæði íbúa verulega. Má þar nefna húshitun, rafmagnsframleiðslu og fjölbreytta atvinnustarfsemi.
Þrátt fyrir þetta segir Snæbjörn að jarðhiti sé að stóru leyti ónýttur ennþá. „Það er margt ónýtt, bara eðli t.d. gufuaflsvirkjana er það að það er rosalega mikið af varma sem í rauninni nýtist ekki. Eitt af því sem menn eru að skoða er hvað geta menn gert við afgangsvarmann. Stóra verkefnið hjá Eim hefur ekki verið að fara að finna ný jarðhitasvæði til að vinna, heldur meira hvernig nýtum við straumana sem koma úr þessum virkjunum, hvernig nýtum við straumana sem koma út úr heita vatninu okkar, hvernig töppum við inn á það sem er fyrir.“
Grænir túrar og matvælaframleiðsla
Sunna Guðmundsdóttir er sérfræðingur hjá Eimi og í innviðagreiningu verkefnisins kom ýmislegt ófyrirséð í ljós. „Í þessari vinnu komu í ljós mjög mikil tækifæri á svæðinu auðvitað en líka mikill áhugi ferðamanna, t.d. á þessum jarðhitatengdu svæðum og samspili manns og náttúru í kringum þennan jarðhita. Í kjölfarið á því fórum við að þróa, í samvinnu við ferðaþjónustuna og sérfræðinga í orkugeiranum, svona græna túra. Þetta eru í rauninni þrír túrar og þar erum við að skoða þessa jarðhitatengdu staði og sjálfbæra nýtingu. Allt þetta þykir ferðamönnunum mjög áhugavert.“ Grænu túrarnir eru því beinlínis afurð Eims verkefnisins.
Sunna bendir einnig á að á þessu svæði hafi matvælaframleiðsla farið fram með notkun jarðhita allt síðan árið 1904. „Við erum stanslaust að leita leiða til að nýta hann enn frekar til matvælaframleiðslu. Það er svona eitt af hlutverkum Eims, að reyna að finna nýju tækifærin. Það hafa komið upp alls konar góðar hugmyndir, og stórar hugmyndir.“
Nýjasta þáttinn af Súrefni, sem inniheldur m.a. viðtölin við Snæbjörn og Sunnu í heild sinni, er að finna hér:
