\"...Og það varð ljós\", segir í Biblíunni.
Merki um þetta fyrsta ljós sem kviknaði í alheiminum hafa nú greinst. Uppgötvunin er sögð vera bylting og sú mikilvægasta í stjarnvísindum síðan þyngdarbylgjur greindust 2015.
Það sem stjörnufræðingarnir fundu í þetta skipti voru merki frá fyrstu stjörnum himingeimsins, þar sem ljós kviknaði fyrst, 180 milljón árum eftir Miklahvell sem varð fyrir 13,7 milljörðum ára. Áður en ljós byrjaði að kvikna í þessum fyrstu stjörnum ríkti aðeins niðamyrkur og tóm. Það tímabil kalla stjarnfræðingar myrkaldir.
Búnaðurinn sem notaður var til að greina merkin var útvarpsloftnet sem sett var upp í auðnum Ástralíu, þar sem minnst truflun er frá öðrum útvarpsbylgjum á Jörðinni, því merkin sem þeir leituðu eru á sama tíðnisviði og ýmsar útsendingar (50- 100 Mhz).
Á þessum árdögum alheimsins sveimuðu fyrstu stjörnurnar um í gassúpu. Ljósáhrifin frá fyrstu stjörnunum mynduðu svo rafsegulbylgjur í vetnisatómum í þessari súpu og þær bylgjur tókst nú að mæla. Bylgjurnar voru svo daufar að alls ekki var víst að næðist að greina þær. En það tókst og vísindamenn líkja því við að greina vængjaslátt kólibrífugls í miðjum hvirfilbyl.
Grein vísindamannanna um afrekið í tímaritinu Nature.
