Í þætti kvöldsins er einnig rætt við Birnu Ásbjörnsdóttur sem hefur starfað í um 20 ár við næringarráðgjöf og fræðslu, hérlendis og erlendis. Birna er að ljúka meistaragráðu í næringarlæknisfræði frá Surreyháskóla og stundar meistaranám við Oxfordháskóla í gagnreyndum heilbrigðisfræðum. Hún gerði nýlega stóra rannsókn á hvort góðir gerlar (probiotics) geti gangast gegn sýkingum.
Þá verður fjallað um Hressleika í þættinum í kvöld, en árlega heldur líkamsræktarstöðin Hress í Hafnarfirði mót með þessu nafni, en tilgangurinn er að skapa frábæra stemmningu á meðal iðkenda, gera sér glaðan dag og safna í leiðinni fyrir mikilvæg málefni. Í ár var ákveðið að styrkja unga fjölskyldu sem gengur í gegnum lífsins ólgusjó en heimilisfaðirinn Kristján greindist nýlega með krabbamein í höfði í annað sinn og þetta ferli reynir augljóslega mikið á fjölskylduna og aðstandendur hennar. Eiginkona hans, Kristín Þórisdóttir er tekin tali af þesu tilefni.
Loks verður fjallað um Klíníkina í Ármúla sem var opnuð fyrir örfáum vikum. Þetta er einkarekin læknastöð með flottum aðbúnaði og þarna koma saman alls konar þjónustuaðilar í heilbrigðiskerfinu. Við kíktum í heimsókn og sáum m.a. hvernig þeim tókst til að breyta Hótel Íslandi í flottar læknastofur.
Heilsutíminn er frumsýndur klukkan 20:00 í kvöld og endursýndur strax klukkan 22:00.
