Sigurður Ingi Jóhannsson, samgöngu- og sveitarstjórnarráðherra og formaður Framsóknarflokksins, segir að það sem hefur verið til umræðu í viðræðum stjórnvalda við aðila vinnumarkaðarins, og er ætlað að liðka fyrir gerð kjarasamninga, muni skila Íslandi á annan og betri stað í þróun samfélagsins. Kjarninn greinir frá.
Þetta er meðal þess sem Sigurður Ingi segir í viðtali við Þórð Snæ Júlíusson, ritstjóra Kjarnans, í frétta- og umræðuþættinum 21 á Hringbraut í kvöld.
Þar segir hann einnig að aðkoma ríkisins að gerð kjarasamninga sé áskorun um að geta komið til móts við ólíka aðila þannig að markmiðið um að verja þau lífskjör sem Íslendingar hafi náð á undanförnum árum náist, auk þess að byggja viðbótargrunn að sókn til nýrra tíma. „Þetta eru fjölmargir þættir sem við erum að taka á. Ég held að það megi alveg tala um það sem slíkt að þetta sé meiriháttar plagg sem við séum að smíða.“
Brot úr viðtalinu má sjá hér:
Meginlínur kjarasamninga á milli VR, Eflingar, VLFA, VLFG, LÍV og Framsýnar og Samtaka atvinnulífsins voru samþykktar skömmu eftir miðnætti. Samningunum er ætlað að standa til 1. nóvember 2022. Samkomulagið er þó með fyrirvara um aðkomu stjórnvalda að samningum, og samþykki samninganefnda þeirra félaga sem eiga aðild að samkomulaginu. Um þá aðkomu hefur verið fundað í allan dag.
Aðspurður hvort að í þeirri aðkomu felist grundvallarbreyting á þeim kerfum sem verið hafa við lýði í þeim málaflokkum sem verið sé að ræða um segir Sigurður Ingi að hann telji svo vera. „Án þess að fara of djúpt í það þá held ég að við getum vænst þess að gangi þetta allt eftir sem við höfum verið í samtali um þá séum við komin á annan stað í þróun samfélagsins í betri átt.“
Nánar er rætt við Sigurð Inga í 21 í kvöld. Þátturinn hefst klukkan 21:00.
