Mega ekki skrá dreng sem barn sitt

Sigmundur Ernir Rúnarsson skrifar

3. mars 2016 kl. 09:15

Fréttir & pistlar

Tvær íslenskar konur fá ekki að vera skráðar sem foreldrar drengs sem staðgöngumóðir í Kaliforníu fæddi þeim samkvæmt dómi Héraðsdóms Reykjaness sem féll í gær. Konurnar voru í sambúð, en hafa nú slitið samvistir.

Konurnar eru þó skráðar foreldrar drengsins samkvæmt dómi í Kaliforníu, að því er fram kemur í frétt RÚV um málið í morgun sem hér er vitnað til. Þar segir að hvorug kvennanna hafi lagt til egg þar sem þungun staðgöngumóðurinnar hafi orðið með tæknifrjóvgun þar sem notuð voru egg og sæði frá nafnlausum gjöfum. Frumvarp heilbrigðisráðherra um staðgöngumæðrun kveður skýrt á um að slíkt verði bannað.

Fram kemur í dómnum að konurnar hafi krafist þess að Þjóðskrá Íslands yrði með dómi gert að skrá þær sem foreldrar drengsins. Dómurinn hafnaði þeirri kröfu á þeim forsendum að staðgöngumæðrun væri ólögleg hér á landi. Í greinargerð íslenska ríkisins og Þjóðskrár, sem lögð var fyrir dóminn, er meðal annars vísað til þeirrar umræðu sem farið hefur fram hér á landi á síðustu árum um staðgöngumæðrun.

Kristján Þór Júlíusson, heilbrigðisráðherra lagði fram frumvarp um staðgöngumæðrun í velgjörðarskyni í september á síðasta ár. Í 10. grein frumvarpsins er lagt til að skylt verði að nota kynfrumu frá að minnsta kosti öðru væntanlegra foreldra, eftir því sem við á.

Í greinargerð frumvarpsins segir að með þessu skilyrði sé lagt til að barn sem verði til við staðgöngumæðrun í velgjörðarskyni eigi alltaf líffræðilega tengingu við væntanlegt foreldri. „Af þessari ástæðu stendur staðgöngumæðrun ekki til boða einstaklingi sem ekki getur lagt fram kynfrumu eða pari sem nota þarf bæði gjafaegg og gjafasæði.“ Þá er í frumvarpinu einnig vísað til sænskra laga þar sem bannað er að koma fyrir fósturvísi í konu ef báðar kynfrumur koma frá gjöfum, að því er segir í fyrrgreindri frétt RÚV um málið í morgun.

Drengurinn hefur búið hjá konunum, en það er nú barnaverndaryfirvalda í sveitarfélagi þeirra að ákveða hvað er barninu fyrir bestu, en konurnar hafa búið í Garðabæ.