Vörusvik eru stórt vandamál í alþjóðlegum sjávarútvergi, þar sem tegundasvindl hefur t.a.m. mælst allt að 30 prósent. Nánast öll framleiðsla Íslands er seld erlendis og því erfitt að fylgjast með og koma upp um svik. Fiskifréttir greina frá.
Jónas Rúnar Viðarsson, faglegur leiðtogi hjá Matís, tók þátt í Evrópuverkefni um matvælasvik er nefnist FoodIntegrity. Hann segir matvælasvik vera stórmál fyrir okkur Íslendinga, en bætir við að það sé mjög erfitt að eiga við þau, enda geti t.d. almennir neytendur átt erfitt með að greina á milli tegunda.
„Það er kannski verið að selja kínverskan eða rússneskan tvífrystan fisk sem ferska íslenska afurð. Í raun og veru er afskaplega lítið sem við getum gert til að sporna við þessu. Ef einhver er til dæmis að selja saltfisk á Spáni eða ferska hnakka í Frakklandi sem íslenska vöru þá þarf einhver að vera þar sem tékkar á þessu,“ segir Jónas Rúnar í viðtali við Fiskifréttir.
Jónas Rúnar er ekki viss um að Ísland sé í stakk búið til að koma sér upp viðbúnaðarsveit eða viðamiklu eftirliti af einhverju tagi, þrátt fyrir að telja að stofnanir á við Heilbrigðiseftirlitið myndu gjarna vilja sinna slíkum málum. „Ef við höfum ekki efni á að vera með grunninnviði í lagi þá skilur maður það að forgangsröðin liggi annars staðar. Eftirlitsaðilar hafa bara hvorki pening né mannskap í þetta. Okkur hjá Matís hefur dottið í hug að bjóða veitingahúsum upp á þjónustu með þetta og þau gætu þá fengið einhvern stimpil frá okkur, og við höfum allt sem til þarf hér innanhús. Það er hins vegar dýrt að sinna þessu og líklega erfitt fyrir flesta að réttlæta þann kostnað, nema menn vilji til dæmis byggja upp einhverja ímynd í kringum það,“ segir Jónas Rúnar einnig.
