Dómur yfir konu sem var dæmd fyrir ölvunarakstur var ómerktur í Landsrétti í gær vegna þess að lögreglumennirnir sem áttu að birta konunni ákæruna birtu hana hvor öðrum og settu inn um bréfalúgu á lögheimili hennar. Konan var dæmd sek að henni fjarstaddri.
Í úrskurði Landsréttar segir að lögreglan í Vestmannaeyjum hafi gert margar tilraunir til þess að birta konunni stefnuna og meðal annars hafi lögreglan fylgst með húsinu sem hún var skráð með lögheimili í:
„Margoft hafi verið farið á lögheimili hennar og fylgst með húsinu í eftirliti lögreglu til að sjá hvort að einhver hreyfing væri í íbúðinni eða ljós tendruð.“
Það hafi þó ekki borið árangur og þegar fjölskyldumeðlimur konunnar hafi sagt lögreglunni að líklega væri húnn stödd á Suðurnesjum hafi málið verið sent til lögreglustjórans á Suðurnesjum. Ekki tókst þó að ná til konunnar þar heldur og því var ákveðið að birta ákæruna með lögheimilisbirtingu og vitnar Landsréttur í skýrslu lögreglumannana um hvernig sú birting fór fram.
„Skýrsluna ritar lögreglumaður A. Í skýrslunni kemur fram að fyrirkallið hafi verið birt fyrir lögreglumanni B og síðan hafi fyrirkallið verið sett inn um bréfalúgu á þeirri íbúð þar sem ákærða var með skráð lögheimili.“
Þar sem lögreglumennirnir höfðu engin tengsl við konuna taldi Landsréttur þetta ekki vera lögmæta birtingu á ákæru og var dómur héraðsdóms því ómerktur og málinu vísað aftur til héraðsdóms.
