Lögreglan á höfuðborgarsvæðinu varar eigendur og umráðamenn ökutækja við því að skilja verðmæti eftir í bílum.
Samkvæmt lögreglunni hefur verið nokkuð mikið um innbrot í bíla á höfuðborgarsvæðinu en þjófum er ekkert heilagt og þeir stela jafnvel jólagjöfum ef því er að skipta enda er jólagjafavertíðin á fullu þessa daganna.
Fyrir utan jólagjafir sem teknar hafa verið ófrjálsum höndum úr bifreiðum eru það einkum símar, tölvur og myndavélar sem freista þjófa, en þetta verða eigendur eða umráðamenn ökutækja að hafa hugfast og muna að skilja ekki nein verðmæti eftir í bílum. Sé það óumflýjanlegt er mikilvægt að slíkir hlutir séu ekki í augsýn.
Þá bendir lögreglan einnig á mikilvægi þess að skilja bíla frekar eftir á upplýstum bílastæðum, ef þess er nokkur kostur. Þjófum finnst nefnilega fátt betra en að athafna sig í myrkrinu þar sem ekki sést til þeirra.
