Lögmaður: lögreglustjóri nú ákærður?

Lögmaður segir að með hæstaréttardómi í fyrradag sé komið fordæmi sem gæti orðið til þess að Sigríður Björk Guðjónsdóttir, fyrrverandi lögreglustjóri á Suðurnesjum en nú lögreglustjóri á höfuðborgarsvæðinu, verði kærð fyrir að miðla upplýsingum sem henni var ekki heimilt að miðla.

Í febrúar árið 2015 felldi Persónuvernd úrskurð þar sem sannað þótti að Sigríður Björk hefði brotið lög um persónuvernd og meðferð persónuupplýsinga, þegar hún sendi Gísla Frey Valdórssyni, þáverandi aðstoðarmanni Hönnu Birnu Kristjánsdóttur, greinargerð um hælisleitandann Tony Omos og fleiri.

Beiðni Gísla Freys studdist ekki við viðhlítandi lagaheimildir um miðlun persónuupplýsinga. Sagði svo í úrskurðarorði:

\"Miðlun Lögreglunnar á Suðurnesjum á skýrsludrögum með persónuupplýsingum um Tony Omos, Evelyn Glory Joseph og fleiri einstaklinga til innanríkisráðuneytisins hinn 20. nóvember 2013, sem og beiðni ráðuneytisins þar að lútandi, studdist ekki við viðhlítandi heimild.

Skortur á skráningu um miðlun draganna í málaskrá lögreglunnar á Suðurnesjum, sem og um öflun þeirra í málaskrá innanríkisráðuneytisins, fór í bága við kröfum um upplýsingaöryggi. Hið sama gildir um skort á skráningu um mótttöku ráðuneytisins hinn 20. nóvember 2013 á framburðarskýrslu Tony Omos frá Útlendingastofnun.

Ekki var gætt viðunandi öryggis við miðlun fyrrnefndra skýrsludraga til ráðuneytisins frá Lögreglunni á Suðurnesjum og fyrrnefndrar framburðarskýrslu frá Útlendingastofnun til ráðuneytisins.“

Sigríður Björk var ekki ákærð vegna brotsins.

Mál hennar hefur nú verið rifjað upp, tæpu áru eftir að Persónuvernd felldi úrskurð sinn, eftir dóm sem féll í Hæstarétti í dag. Þá var Gunn­ar Scheving Thor­steins­son lögreglumaður dæmdur sekur um brot eftir að hann greindi vinum sínum rafrænt frá því að 13 ára drengur hefði skallað sig. Gunnari var þó ekki gerð refsing í málinu

Mbl.is gerði frétt um nýja dóminn í gær. Hefur mbl.is eftir Garðari Steini Ólafs­syni, lögmanni Gunn­ars, að rík­is­sak­sókn­ari hafi tekið ít­rekaðar ákv­arðanir um að þegar ekki ligg­ur fyr­ir ásetn­ing­ur um að brjóta gegn því ákvæði sem dæmt var eftir sé ekki ákært, eins og til dæm­is í til­viki Sig­ríðar Bjark­ar þegar hún veitti upp­lýs­ing­ar sem Per­sónu­vernd komst að þeirri niður­stöðu að hefði verið lög­brot að veita.

„Þá var hún ekki ákærð,“ seg­ir Garðar. „Sam­kvæmt þessu hefði átt að gera það og það er ennþá hægt.“

Frétt mbl.is má lesa í heild hér.