Fátt nýtt er að finna í sóknaráætlun ríkisstjórnarinnar í loftslagsmálum. Áætlunin nær til næstu þriggja ára og sextán verkefna. Kostnaðarmat fyrir sóknaráætlunina hefur ekki verið gert.
Þetta kemur fram í Fréttablaðinu í dag þar sem rætt er við vonsvikna náttúruverndarmenn sem gefa stefnu stjórnvalda í þessu efni lága einkunn, svo ekki sé fastar að orði kveðið.
Í frétt blaðsins er vitnað til þess að sóknaráætlun Íslands í loftslagsmálum til næstu þriggja ára hafi verið kynnt í gær og sett þar fram í tengslum við loftslagsráðstefnu Sameinuðu þjóðanna (COP21) í París sem hefjist á mánudaginn kemur. Að stofni til séu í sóknaráætluninni 16 verkefni sem sett verði af stað – átta þeirra snúi að því að draga úr nettólosun gróðurhúsalofttegunda á Íslandi; í samgöngum, sjávarútvegi, landbúnaði og landnotkun. Orkufrekur iðnaður falli hins vegar undir viðskiptakerfi ESB með losunarheimildir (ETS) og komi þar ekkert við sögu.
Í kynningu stjórnvalda á sóknaráætlun sinni segi: „…lögð verður fram heildstæð áætlun um orkuskipti í samgöngum og lagður grunnur að því að bæta innviði fyrir rafbíla á landsvísu. Í sjávarútvegi og landbúnaði verða unnir vegvísar um minnkun losunar í samvinnu atvinnulífs og stjórnvalda. Sett verður aukið fé til landgræðslu og skógræktar og hafist handa við endurheimt votlendis. Einnig verður gert átak til að draga úr matarsóun, sem veldur óþarfa losun.“
Árna Finnssyni, formanni Náttúruverndarsamtaka Íslands er ekki skemmt: \"Alltaf þegar stjórnvöld eða fyrirtæki kynna sóknaráætlanir af þessu tagi verður að spyrja: Hversu mikið og hvenær? Ég finn eitt slíkt markmið sem endurspeglar vaxandi þunga í umhverfisstefnu sjávarútvegsfyrirtækja. Sjávarútvegurinn á mikið undir og hefur nú brugðist við með ábyrgum hætti,“ segir hann við blaðið og bætir við: \"Hvað með landbúnað og samgöngur? Engin ný markmið. Svo er reynt að velta ábyrgðinni á einstaklinga með skilaboðunum: Bannað að leifa mat. Vitaskuld er sjálfsagt að fara vel með mat en stjórnvöldum dugir ekki að benda á einstaklinginn þegar þau hafa nánast ekkert aðhafst til að draga úr losun frá samgöngum, landbúnaði eða hafið endurheimt votlendis.“
Guðmundur Ingi Guðbrandsson, framkvæmdastjóri Landverndar, tekur undir með Árna í Fréttablaðinu í dag: \"Það er ánægjulegt að sjá að tímasett markmið eru sett fram fyrir sjávarútveginn og að vinna á að úttekt á aðlögun að loftslagsbreytingum. Þá er rætt um rafbílavæðingu, aðgerðir í landbúnaði, átak gegn matarsóun og eflingu kolefnisbindingar með skógrækt, landgræðslu og endurheimt votlendis. Allt er það gott og vel, en það vantar tímasett markmið um samdrátt í losun/kolefnisbindingu fyrir þessa þætti og hve mikið fjármagn eigi að tryggja í hvern og einn þeirra. Þannig er þetta meira áætlun um að gera áætlun. Það vantar loforð um að efla almenningssamgöngur og hjólreiðar, auk þess sem efla þarf sveitarfélögin í þeirra vinnu.“
