Már Guðmundsson seðlabankastjóri flutti erindi á ársfundi Samtaka atvinnulífsins í vikunni þar sem hann talaði fyrir breytingum sem hann telur æskilegar í peningastefnu landsmanna eftir að haftalausnin gengur í gegn. Hann vill að meginmarkmið peningastefnu verði áfram stöðugt verðlag og að það verði útfært með formlegu og tölusettu verðbólgumarkmiði eins og nú er. Í stað nánast hreins flotgengis eins og fyrir fjármálakreppu kæmi þó sveigjanlegt gengi.
\"Um væri að ræða stýrt flot sem hefði þó ekkert tiltekið gengismarkmið heldur væri markmiðið að draga úr óhóflegum sveiflum vegna tímabundins fjármagnstreymis og draga úr skammtímaflökti í gengi. Stofnanafyrirkomulag peningastefnunnar yrði óbreytt frá því sem nú er en það byggir á sjálfstæðri peningastefnunefnd sem tekur ákvarðanir um beitingu stjórntækja, sendir frá sér yfirlýsingar sem útskýra þær og gerir einnig á öðrum vettvangi þingi og þjóð grein fyrir stefnu sinni. Þetta kerfi er í stórum dráttum í samræmi við bestu erlendar fyrirmyndir og hefur reynst vel.\"
Margir bölva vaxtastefnu Seðlabankans en Már vill að vextir í viðskiptum Seðlabankans við fjármálastofnanir verði við venjulegar aðstæður áfram helsta stjórntæki bankans.
\"Það er verkefni næstu mánaða að útfæra ramma peningastefnunnar og því verki þarf að ljúka áður en fjármagnshöft á innlenda aðila eru losuð. Endanlegt form hans er að mínu viti sameiginleg yfirlýsing ríkisstjórnar og Seðlabankans eins og gert var fyrir 15 árum, árið 2001. Umræðan heldur því áfram. Í því sambandi þakka ég Samtökum atvinnulífsins fyrir að taka þetta mál á dagskrá hér í dag og gefa mér færi á að ræða mín sjónarmið til þess. Eitt skulum við hafa í huga að lokum. Nýr rammi verður betri en sá sem við höfðum fyrir fjármálakreppu. En hann verður engin töfralausn. Það er takmarkað sem peningastefnan getur til lengdar skilað og hún verður áfram framkvæmd við skilyrði óvissu í síbreytilegum heimi. Hún á þó við flestar aðstæður að geta til lengri tíma litið skilað okkur verðstöðugleika og það er ekki svo lítið.
