Ritstjórarnir á Hringbraut í gærkvöld ræddu í þaula einhverja loðnustu yfirlýsingu forseta Íslands sem hraut af vörum hans við setningu Alþingis í gærdag, en tilhlýðendur spyrja sig hvort hann hafi þar verið að kveðja embættið - eða ekki.
Samfélagsmiðlar loguðu lengi gærdagsins og fram á kvöld eftir setningarræðu forsetans sem talaði fráleitt skýrt um það hvort hann biði sig fram aftur á næsta ári eða ekki. Hann sagðist þar vera að setja Alþingi í síðasta sinn í núverandi umboði, sem kann að hljóma eins og hann sé að hætta, en felur einnig í sér þann möguleika að hann geri það aftur með endurnýjað umboð, bjóði hann sig fram að nýju.
Ritstjórarnir og blaðamennirnir Erla Hlynsdóttir og Ingimar Karl Helgason mættu til leiks í Ritstjóraþættinum í gærkvöld og rýndu í þessu nýjustu tíðindi af forseta Íslands, en þau voru sammála um að Ólafur Ragnar væri með þessum óljósu orðum sínum að kanna hug þjóðarinnar til þess hvort hann ætti að bjóða sig fram í sjötta sinn, en hann mun á næsta ári hafa setið við völd í fimmtung aldar, lengur en nokkur annar forseti í sögu lýðveldisins.
Ræðan minnti ritstjórana á pólitísk klókindi forsetans sem hefði verið hans einkennismerki í stjórnmálum og síðar á forsetastóli, sjálfur hefði hann tekið sér mun meiri völd en fyrri forsetar, en þó í reynd í samræmi við vilja þjóðarinnar á hverjum tíma sem hefði endurkosið hann oftar en einu sinni og viðurkennt í ræðu og riti mikilvægi þess að forsetinn gegndi ákveðnu öryggishlutverki þegar kæmi að sambandi þings og þjóðar. Framhjá því yrði ekki litið að framkvæmdavaldið á Íslandi hefði oftsinnis tekið sér alltof mikil völd - og rænt Alþingi áhrifum sínum - og því væri eðlilegt að forsetinn gæti gripið inn í ef hagsmunaöfl í ráðuneytunum færu á svig við vilja þjóðarinnar á hverjum tíma. Ólafur Ragnar hefði með öðrum orðum tekið sér völd sem væru þjóðinni hans að stórum hluta þóknanleg.
Í þættinum var einnig rætt um væntanlega ásýnd Alþingis í haust, líkindin á því að aðrir flokksformenn gömlu flokkanna en Guðmundur Steingrímsson axli sín skinn - og svo auðvitað fótboltafárið, en ritstjórarnir voru sammála um að nú væru landsmenn að uppskera árangur þess góða og metnaðarfulla barna- og unglingastarfs í knattspyrnu, bæði karla og kvenna, sem mætti líkja við tónlistarbyltinguna á sínum tíma eftir að flóttafólk frá Austur-Evrópu kom hingað til lands um og upp úr miðri síðustu öld og kenndi krökkum fyrri tíðar á hljóðfæri sem aldrei fyrr, en það hefur einmitt skilað sér í rísandi frægðarsól íslenskra tónlistarmanna einni eða tveimur kynslóðum síðar.
Ritstjórarnir eru endursýndir í dag, en eru einnig aðgengilegir á hringbraut.is í klippum eða heild sinni.
