Kannski eru Íslendingar ekki bundnir neinum vorboða eins ljúfum böndum og sjálfri lóunni, en óræk sönnun þess að lóan er komin hefur verið birt á netmiðlum í dag.
Guðmundur Falk tók mynd af fyrstu lóunni sem vitað er til að hafi verið fest á filmu þetta árið við Garðskagavita.
Eftir því sem fram hefur komið í fréttum er lóan seinna á ferð en í fyrra. Meðalkomutími fuglsins undanfarna tvo áratugi er 23. mars eftir því sem fram kemur á visir.is.
Í kvæði Páls Ólafssonar sem sérhvert mannsbarn hér á landi kunni lengi vel, segir:
Lóan er komin að kveða burt snjóinn,
að kveða burt leiðindin, það getur hún.
Hún hefur sagt mér, að senn komi spóinn,
sólskin í dali og blómstur í tún.
Hún hefir sagt mér til syndanna minna,
ég sofi of mikið og vinni ekki hót.
Hún hefir sagt mér að vakna og vinna
og vonglaður taka nú sumrinu mót.
