Reiði og sorg eru viðbrögð ljósmæðra, segir Katrín Sif Sigurgeirsdóttir formaður þeirra um orð Bjarna Benediktssonar fjármálaráðherra í fréttum RÚV um helgina.
Ljósmæður semja við fjármálaráðuneytið um kjör en þær hafa mætt hindrunum í vegferð sinni að betri kjörum. Til að mynda var úrskurðað af hálfu ríkisins að þær mættu ekki sleppa yfirvinnu, líkt og þær hugðust gera. Enn fremur segir fjármálaráðherra nú að kröfur ljósmæðra um launahækkun sé tuttugu prósentum hærri en ríkisvaldið sé tilbúið að verða við og sé langt umfram það sem aðrir hópar fá.
Þessa tölu kannast ljósmæður ekki við og sárnaði að Bjarni skuli viðhafa þetta lokst þegar hann tali til ljósmæðra. Þeim hafi boðist 4,21 prósent og ekkert annað.
Ljósmæður hafa bent á að kröfur þeirra snúist ekki um launahækkun heldur launaleiðréttingu. Ljósmæður hér á landi klára hjúkrunarfræðinám í 4 ár og svo taka önnur tvö ár við til að verða ljósmóðir. Við árin tvö til viðbótar lækka hins vegar laun þeirra þar sem þær fara úr stéttarfélagi hjúkrunarfræðinga til ljósmæðrafélags og þar séu kjörin lægri. Þetta kom fram í viðtali á Þjóðbraut í fyrri mánuði þar sem katrín Sif og formaður Ljósmæðrafélagsins ræddu málin í upphafi kjarabaráttunnar.
Samningafundur er boðaður á mánudag með samninganefnd ríkisins en ljóðsmæður hafa enga trú á fundinum, þær hafi upplifað niðurlægingu og áhugaleysi.
Orðrétt segir Katrín Sif í fréttum Rúv: „Maður hefur upplifað það á þessum fundum að þetta sé bæði tíma- og peningasóun, og manni finnst þetta bara hreint út sagt vera svolítill skrípaleikur þar sem verið er að leika sér að peningum almennings, því það hafa engar eiginlega samningaviðræður átt sér stað.“
„Það hefur aldrei verið neitt samtal”, segir hún.
Margar ljósmæður hafa sagt upp störfum, meðal annars Katrín Sif en þær hafa ekki umboð til verkfalla nema hjá heilsugæslunni á höfuðborgarsvæðinu.
