Lilja Dögg Alfreðsdóttir, menningar- og viðskiptaráðherra, segir mikilvægi lesturs og lesskilnings ótvírætt í nýjum pistli í Morgunblaðinu í morgun.
„Við höfum lagt á það ríka áherslu síðustu ár að bæta læsi, ekki síst hjá börnunum okkar. Orðaforði og lesskilningur eykst með auknum lestri og því er ómetanlegt fyrir börn að lesa, taka glósur og spyrja út í orð sem þau þekkja ekki. Orðaforði barna skiptir miklu máli fyrir vellíðan og árangur í skóla og býr þau undir virka þátttöku í samfélaginu. Með aukinni menntun eykst samkeppnishæfni þjóðarinnar og geta hennar til að standa undir eigin velferð,“ segir Lilja Dögg.
Lilja Dögg segir að í tilefni af þátttöku íslensku stelpnanna í Evrópumóti kvenna í knattspyrnu sem fer fram í Bretlandi skipuleggi menningar- og viðskiptaráðuneytið og mennta- og barnamálaráðuneytið lestrarhvatningarherferðina, Tími til að lesa, sem ætluð er fyrir lesendur á grunnskólaaldri í sumar.
Nánari upplýsingar er að finna á vefsíðunni www.timitiladlesa.is en að sögn Lilju Daggar á hvatningin að vera skemmtileg og innblásin af þátttöku stelpnanna á EM í sumar.
„Að þessu sinni snýst lestrarhvatningin um bæði lestur og sköpun. Börn og foreldrar gera með sér samning um ákveðinn mínútufjölda í lestri fyrir hvern leik og hvert mark sem stelpurnar okkar skora á EM.“
Lilja Dögg segir það vera staðreynd að ef barn les ekkert yfir sumartímann getur orðið allt að þriggja mánaða afturför á lestrarfærni þess í sumarfríinu.
Hægt er að lesa pistil Lilju Daggar í heild sinni hér.
