„Það er ævinlega svo að hæst bylur í tómu tunnunum og hefur þar aldrei verið nein undantekning á. Nú er það umræðan um orkupakka þrjú og kepptust fyrir nokkru utanríkisráðherra, Guðlaugur Þór, og fagri ferðamálaráðherrann með mörgu nöfnin, að bulla út í eitt á fundum um að orkupakkinn skipti bara engu máli. Þeim láðist að geta þess í öllu bullinu að með því að samþykkja orkupakkann væri það byrjunin á að koma Íslandi í krumlurnar á ESB-skrímslinu.“
Þannig hefst pistill í Morgunblaðinu eftir Hjörleif Hallgrímsson, fyrrverandi ritstjóra Vikudags á Akureyri. Þar fjallar Hjörleifur gagnrýnir framgöngu Sjálfstæðismanna en stað þess að nefna Þórdísi Kolbrúnu R. Gylfadóttur á nafn kallar hann Þórdísi fagra ferðamálaráðherrann með mörgu nöfnin. Þórdís Kolbrún er ferðamála-, iðnaðar- og nýsköpunarráðherra og starfandi dómsmálaráðherra.
Þórdís Kolbrún gagnrýnir Hjörleif á Twitter-síðu sinni. Þar segir hún:
„Geggjað framúrstefnulegt trix að þykjast ekki - eða leggja ekki á sig að muna nafn á konu. Álag á þeim. Þórdís Kolbrún eru 13 stafir. Guðlaugur Þór eru 12. Ég legg ekki meira á ykkur krakkar.“
Fleiri taka undir þessa gagnrýni en Vilhjálmur Þorsteinsson fjárfestir og fyrrverandi gjaldkeri Samfylkingarinnar segir: „Það lekur af þessu karlremban og feðraveldishrokinn. Svona viðhorf eru löngu komin fram yfir síðasta söludag.“
Þá segir Heiða Björg Hilmisdóttir borgarfulltrúi og varaformaður Samfylkingar:
„Þetta virkaði síðustu aldir, en við munum sko sjá til þess að þessi gömlu trix virki aldrei meir!“
