Leifur Ingi Magnússon bjargaði mannslífi, ásamt mági sínum, þegar tveir menn féllu í í Úlfljótsvatn í gær. Annar maðurinn, bandaríkjamaður er látinn. Leiðsögumaður hans var hætt kominn. Leifur Ingi segir mikilvægt að björgunarhringir séu til staðar á straumþungum veiðisvæðum eins og þessu. Í samtali við Morgunblaðið segir Leifur:
„Ég og mágur minn vorum þarna við veiðar og það kemur þarna íslenskur leiðsögumaður með þrjá erlenda ferðamenn með sér. Við vorum sitthvorum megin við eyju sem er þarna á Kaldárhöfðanum. Við ákváðum að taka okkur pásu og athuga hvort að þeir væru búnir að fá fisk. Við löbbuðum þarna til þeirra og fyrsta sem við sjáum er íslenski leiðsögumaðurinn úti í vatni. Okkar fyrsta hugsun var bara „hvað er í gangi, er hann að synda þarna?“ Okkur fannst við sjá hatt þarna aðeins lengra og við áttum okkur fljótlega á því að leiðsögumaðurinn er í vandræðum og hausinn á honum rétt upp úr vatninu og hann er þarna að örmagnast.“
Leifur segir að hann og mágur hans hafi klætt sig úr og farið út í vatnið. Fljótlega áttuðu þeir sig á að ekki var um hatt að ræða. Leifur segir:
„Á leiðinni áttum við okkur á því að þetta sem við sáum var ekki hattur heldur maður sem flaut þarna. Við förum með manninn í land og komum honum í þurr föt og áttum okkur á því að við náum ekki til erlenda mannsins. Við náum að kalla á fólk sem var þarna úti hinum megin á bakkanum og segja þeim að það sé ennþá maður í vatninu.“
Leifur greinir frá því að ekki hafi tekist að bjarga lífi bandaríska mannsins. Hann segir í samtali við Morgunblaðið:
„Þetta er náttúrulega gríðarlega kalt vatn sem klárar þig á fimm mínútum.“
Ítarlegt viðtal við Leif er að finna á vefsíðu Morgunblaðsins.
