"Tímasetningin á skuldaleiðréttingu stjórnvalda var ekki heppileg eins og nú er greinilega að koma á daginn," segja sérfræðingar á hagfræðideild Alþýðusambands Íslands í samtali við hringbraut.is. Vegna viðvarandi framboðsvanda á íbúðahúsnæði hafi leiðréttingin þó ekki ein og sér valdið aukinni verðþenslu á fasteignamarkaði en hún eigi þó sinn þátt í hennisem aftur hafi svo skilað sér í hækkunum á skuldum landsmanna. Að einhverju leyti er leiðréttingin því að ganga til baka með því að éta upp ávinning sinn.
Fasteignaverð hefur á þremur mánuðum, eftir að tilkynnt var um 80 milljarða króna tilfærslu fjármuna úr ríkissjóði til heimilanna, hækkað um rösklega 4% sem á sér varla fordæmi á svo stuttum tíma. Við þessa snöggu hækkun fór verðbólgan úr einu prósenti í 1,6 með viðhlítandi áhrifum á skuldastöðu fólks.
Hagfræðingar ASÍ eru að leggja lokahönd á nýja hagspá sambandsins sem verður kunnjgörð eftir páska, en hún gildir til 2017. Þar kemur fram að mjög aukin óvissa er í hagþróun eftir tiltölulega stöðugt tímabil þar sem innflutt verðhjöðnun og gengisjafnvægi réðu mestu um hagfellda tíð. Óhægt sé um vik að spá fyrir um þróun verðbólgunnar á næstu misserum og eins hvaða áhrif skuldaleiðréttingin hafi til langs tíma. Ekki megi þó, eins og fyrr greinir, ætla henni einni að hafa áhrif á enn frekari hækkun á fasteignaverði því langær skortur á húsnæði skipti þar vissulega miklu máli, en mun minna sé nú byggt af íbúðum en sem nemur uppsafnaðri þörf fyrir húsaskjól.
