Benedikt Jóhannesson stærðfræðingur og útgefandi Frjálsrar verslunar metur það svo að launaskrið bankamanna sé aftur komið á fullt, en í Launaþættinum á Hringbraut á þriðjudagskvöld fór hann yfir þróun launa á Íslandi síðustu árin.
Aldarfjórðungur er liðinn frá því Frjáls verslun hóf að birta tekjur landsmanna í sérstöku blaði, en í fyrstu voru aðeins birtar upplýsingar um laun 145 manna. Sá fjöldi hefur aukist að mun, en í nýjasta tekjublaði Frjálsrar verslunar er nöfn 3,725 Íslendinga að finna í margvíslegum atvinnugreinum.
Í máli Benedikts kom fram að æðstu stjórnendur fyrirtækja hefðu haldið aftur af sér milli tveggja síðustu ára og greinilegt væri að umræða um of há stjórnarlaun og hækkun þeirra á síðustu misserum í samanburði við lágmarkslaun hefði haft sín áhrif í samfélaginu. Millistjórnendur hefðu hækkað mikið í launum á milli áranna 2012 og 2013 en dregið hefði líka úr því launaskriði.
Athygli vekti líka að sjómenn hefðu almennt lækkað í launum á síðasta ári miðað við það sem oft hefur verið en það mætti rekja til loðnuvertíðar sem brást, en raunar væru margar stéttir í landinu afkomutengdar með þessum hætti að sögn Benedikts sem var aðalgestur þáttarins.
Einnig komu þeir Gylfi Arnbjörnsson forseti ASÍ og Þorsteinn Víglundsson framkvæmdastjóri SA fram í þættinum. Gylfi taldi launabilið vera orðið of breitt í landinu, en það væri hundraðfalt á milli lágmarkslauna og launa forstjóra Íslenskrar erfðagreiningar sem var með hæstu forstjóralaunin á síðasta ári. Eðlilegt væri að miða við tífalt launabil, svona fámenn þjóð sem Íslendingar væru þyldi ekki meir. Þorsteinn var þessu ósammála, sagði einmitt að launajöfnuður hér á landi væri meiri en víða þekktist og það væri af hinu góða. Ómögulegt væri að setja eitthvert þak á hærri launin; það yrði að vera keppikefli fólks að mennta sig og ná frama í skiptum fyrir betri kjör.
Þeir voru ósammála um hvort birta eigi launakjör nafngreindra manna á Íslandi. Gylfi taldi það eðlilegt í lýðræðisamfélagi, skapa upplýsandi umræðu, samanburð og aðhald. Þorsteinn taldi óþarfi að birta þær með nöfnum fólks; þessar upplýsingar lægju fyrir hjá Hagstofunni hvað allar stéttir varðaði og því óþarfi að svala þörfum forvitninnar með þessum hætti.
Benedikt Jóhannesson svaraði þessari spurningu á þann veg að alltaf væru uppi einhverjir stjórnmálamenn sem vildu hampa leyndarhyggjunni og halda upplýsingum frá almenningi. Hann vildi ekki vera í þeim hópi.
Launaþáttinn er hægt að nálgast í heild sinni inni á hringbraut.is eins og alla aðra þætti stöðvarinnar.
