Þegar launamunur kynjanna er skoðaður á öllum Norðurlöndunum kemur í ljós að hann er hvergi meiri en á Íslandi. Maríanna Traustadóttir jafnréttisfulltrúi hjá Alþýðusambandi Íslands segir erfitt að segja til um ástæðu þessa; ef til vill sé hennar að leita í mismunandi kúltúr frá einu landi til annars, en hluta af skýringunni megi þó ugglaust grafast fyrir um í misjafnlega góðu fæðingarorlofskerfi á Norðurlöndunum. "Hér á landi er fæðingarorlofskerfið svo að segja í dauðaslitrunum," segir hún og vísar til þess að karlmenn, sem yfirleitt hafi að jafnaði meira 15 prósent hærri laun en konur, séu nánast hættir að taka fæðingarorlof; æ meiri tekjutenging hafi gert það að verkum að þeir telja sig ekki lengur hafa efni á orlofinu.
Maríanna bendir á að nú sé verið að vinna úr viðamikilli nýrri launakönnun hér á landi á vegum Hagstofunnar, þeirri fyrstu sinnar tegundar sem nær bæði til fólks á almennum og opinberum vinnumarkaði. Fyrstu niðurstöður bendi til þess að heldur sé að draga úr launamun kynjanna hér á landi, en enn sé þó langt í land að konur og karlar njóti að jafnaði sömu kjara fyrir sambærilega vinnu.
