Öryggisvörðurinn við háskólann í Ósló sem tilkynnti um að hafa verið skotinn af tveimur mönnum í fyrrinótt laug að lögreglu. Í ljós hefur komið að það var hann sjálfur sem skaut og kom fyrir eftirlíkingu að sprengju vip skólann.
Þetta staðfestir Grete Lien Metlid, lögreglustjóri í Ósló á blaðamannafundi lögreglunnar í morgun, en að hennarsögn breytti öryggisvörðurinn frásögn sinni af atburði næturinnar í gærkvöldi og hefur hann nú verið kærður fyrir meinsæri.
Öryggisvörðurinn hafði samband við lögregluna aðfararnótt miðvikudags og sagðist hafa orðið fyrir skoti er hann var við störf á háskólasvæðinu. Sagði hann að tveir menn hefðu verið að verki og hefði annar þeirra skotið hann með litlum riffli og þeir síðan forðað sér á hlaupum. Öryggisvörðurinn var í skotheldu vesti og slasaðist því aðeins lítillega þar sem skot hæfði hann í brjóstið.
Lögreglan girti af stórt svæði við háskólann og fannst hlutur sem jafnvel var talið að væri sprengja. Síðar kom í ljós að um eftirlíkingu var að ræða og taldi lögreglan að tilræðismennirnir hafi ætlað að vekja ótta.
