„Háværar umræður eiga sér stað um Þriðja orkupakkann. Margir góðkunningjar íslenskrar þjóðmálaumræðu hafa látið til sín taka; Guðni Ágústsson, Jón Baldvin Hannibalsson, Davíð Oddsson og fleiri. Síðast heyrðist enn einu sinni frá Styrmi Gunnarssyni, fyrrum ritstjóra Morgunblaðsins en hann er í samtökunum Orkan okkar sem leggst gegn Þriðja orkupakkanum. Styrmir sagði baráttu samtakanna snúast um „föðurlandsást“ og „þjóðerniskennd“. Raunar gekk hann enn lengra og sagði sömu kenndir grundvöll Brexit-hreyfingarinnar um útgöngu Breta úr Evrópusambandinu.“
Þetta skrifar Kristín Þorsteinsdóttir, útgefandi Fréttablaðsins, í leiðara blaðsins í dag.
Hún segir samlíkingu Styrmis við Brexit óheppilega, enda hafi Brexit öðru fremur snúist um metorðagirni einstaklinga innan Íhaldsflokks Breta. Forvígismenn Brexit hafi auk þess viðurkennt morguninn eftir kjördag að þeirra helstu fullyrðingar hafi verið samhengislausar lygar.
„Almennt er viðurkennt að sársaukalausast sé að breyta sem minnstu í sambandi Bretlands við Evrópusambandið. Það hefði því betur verið heima setið en af stað farið. Merkilegt er ef gamli ritstjórinn ætlar að gera Brexit-klúðrið að rómantískri fyrirmynd fyrir íslenskra andstæðinga Þriðja orkupakkans,“ segir Kristín.
Hún veltir því fyrir sér hvort það sé ætlun samtakanna að líta til Brexit sem fyrirmyndar í baráttu sinni. „Kannski missti Styrmir út úr sér kjarna málsins. Er það ætlun Orkunnar okkar að heyja baráttu í anda Brexit? Á að bjaga sannleikann og búa til hliðstæðan veruleika þar sem vegið er að sjálfstæði þjóðarinnar? Ýmislegt bendir til þess, en að baki fylkingunni standa annars vegar landsþekktir popúlistar og hins vegar gamlar kempur sem eygja síðasta möguleikann á að kreista lokageislana úr sviðsljósinu.“
Kristín segir flesta málsmetandi stjórnmálamenn og sérfræðinga telja að í tilskipuninni felist hvorki hvorki framsal á fullveldi né yfirráðum yfir orkuauðlindum. „Ef barátta andstæðinga orkupakkans snýst um að Ísland dragi sig út úr alþjóðasamstarfi með uppsögn EES-samningsins er best að það sé sagt. Þá er hægt að eiga opna og hreinskiptna umræðu, enda er það svo í samningsbundnu samstarfi að ekki verður bæði sleppt og haldið.“
Að lokum segir hún að stærstur hluti lífsgæða okkar sé tilkominn vegna samskipta við aðrar þjóðir og að þar hafi EES skipt mestu máli. „Fólk ætti að horfa í kringum sig og átta sig á því að öll okkar tilvera byggist á óhindruðum milliríkjasamskiptum. Hvort sem það er bíllykillinn í vasanum eða kaffið í krúsinni. Íhugum það áður en við trúum orði frá gömlu sviðsljóssfíklunum.“
