Páll Matthíasson forstóri Landspítalans kallar eftir aukafjárveitingu svo takast megi að vinna upp, fara yfir og forgangsraða öllum þeim fjölda mála sem setið hefur á hakanum á meðan á verkfalli heilbrigðisstétta stóð.
Frumvarp ríkisstjórnarinnar um lög á verkfallsaðgerðir Bandalags háskólamanna og Félags íslenskra hjúkrunarfræðinga var samþykkt á Alþingi á áttunda tímanum á laugardagskvöld að lokinni þriðju umræðu. Lögin taka þegar gildi samkvæmt frumvarpinu og verkfallsaðgerðum félaganna, sem staðið hafa yfir undanfarnar vikur, er þar með lokið.
Verkfall BHM stóð frá 7. apríl, eða í rífa tvo mánuði. Verkfall FÍH stóð frá 27. maí, eða í nálega þrjár vikur.
Páll Matthíasson segir spítalans bíða risaverkefni við að vinda ofan af þeim vanda sem blasi við eftir svo langt verkfall geislafræðinga, lífeindafræðinga, náttúrufræðinga og nú síðast hjúkrunarfræðinga á þjóðarspítalanum. Öllum megi ljóst vera að það endurreisnarstarf verði ekki unnið innan núverandi fjárheimilda spítalans, enda sé verkefnið risavaxið. Ekki bæti heldur úr skák að sumarleyfi séu að hefjast á þessum mannmarga vinnustað. Hann segir að enn sé ekki sé búið að meta kostnað við að vinna á vandanum, en það verði skoðað á næstunni.
Á annað þúsund hjúkrunarfræðingar og annað starfsfólk spítalans sem verið hefur í verkfalli hóf störf í nótt samkvæmt vaktatöflu, en á næstu dögum kemur í ljós hversu margir þeirra standa við þá hótun sína frá síðustu dögum að segja upp störfum til að mótmæla því að menntun skuli ekki metin til launa af ríkisvaldinu.
Verkfallslögin gilda til 1. júlí. Hafi ekki samist fyrir þann tíma kemur það í hlut gerðardóms að ákveða launakjör umræddra stétta.
