Íslendingar og aðrir landsmenn voru samtaka í klósettferðum á meðan Eurovision stóð í gær. Samkvæmt tölum Veitna má sjá það greinilega að notkun á köldu vatni minnkaði umtalsvert á meðan flutningur íslenska liðsins var í loftinu.
Í tilkynningu frá Veitum segir að stórir viðburðir sem þessi gefi áhugaverðar upplýsingar um sameiginlegt hegðunarmynstur borgarbúa og væntanlega landsmanna allra.
Þá segir að leiða megi líkum að því að skrifa megi sveiflur í notkun vatns, á meðan á söngvakeppninni stendur, á að fólk sé að létta á sér og sturta niður.
Svo virðist sem nokkur fjöldi hafi séð ástæðu til að skreppa á klóið áður en myndbandið með framlagi Íslands, 10 Years, var sýnt og hið sama var uppi á teningnum þegar laginu lauk.
Á milli þessara tveggja toppa minnkar notkun á köldu vatni umtalsvert enda sátu margir límdir við skjáinn til að fylgjast með flutningnum.
Þá kemur fram í tilkynningunni að vatnsnotkun Reykvíkinga sé yfirleitt töluvert minni þegar lokakeppni Eurovision stendur yfir en á hefðbundnu laugardagskvöldi. Notkunin minnkar svo stöðugt þegar líður á kvöldið, og er með allra minnsta móti þegar íslenska lagið er flutt og svo aftur þegar úrslitin verða ljós.
Þegar útsendingu keppninnar lýkur eykst vatnsnotkun og verður fljótt í samræmi við það sem gerist á venjulegum laugardagskvöldum.
Tölurnar að baki myndinni, hér að ofan og neðan, eru rennslismælingar úr kerfi vatnsveitu Veitna í Reykjavík sem fær allt sitt vatn úr vatnsbólunum á vatnsverndarsvæðinu í Heiðmörk.
