Aldrei hafa fleiri konur nefnt ofbeldi gegn börnum sem ástæðu komu í Kvennaathvarfið á síðasta ári. Í tilkynningu frá Kvennaathvarfinu kemur fram að á síðasta ári flúðu 144 konur og 100 börn undan ofbeldismönnum í Kvennaathvarfið. Konur dvöldu í athvarfinu frá einum degi uppí 236 daga eða að meðaltali í 30 daga. Börn dvöldu í athvarfinu í frá einum degi upp í 155 daga, að meðaltali í 39 daga. Konurnar voru á aldrinum 18 ára til 81 árs. Börnin voru frá nokkurra daga gömul upp í 16 ára.
Ofbeldismennirnir voru að 95% karlmenn, 72% eru af íslenskum uppruna og voru þeir á aldrinum 18-83ja ára.
Að meðaltali dvöldu 23 íbúar í athvarfinu á dag, 12 konur og 11 börn. Þá komu 294 konur í samtals 545 viðtöl án þess að til dvalar kæmi. Samtals komu því 438 konur í athvarfið í viðtöl eða dvöl á árinu. Til viðbótar hittu ráðgjafar athvarfsins 214 einstaklinga í viðtölum í Bjarkarhlíð, miðstöð fyrir þolendur ofbeldis.
Ástæða komu (flestar konur nefna fleiri en eina ástæðu komu).
Andlegt ofbeldi 93%
Líkamlegt ofbeldi 60%
Fjárhagslegt ofbeldi 48%
Kynferðislegt ofbeldi 37%
Ofbeldi gegn börnum 35%
Morðhótanir 26%
Kyrkingatak 25%
Stafrænt ofbeldi 20%
Eltihrellir 16%
Fram kemur í svörum kvennanna að alls búa 349 börn undir 18 ára að aldri á ofbeldisheimilunum sem þær koma af. Einungis 27% barnanna höfðu fengið einhverja aðstoð vegna þess ofbeldis sem barnið bjó við á heimili sínu en 44% kvennanna sögðu að barnavernd hefði verið tilkynnt um ofbeldið.
Alls voru 12% kvennanna með líkamlega áverka við fyrstu komu í athvarfið (23% dvalarkvenna og 6% kvenna í viðtölum) en rúmlega helmingur (53%) sögðu frá því að hafa einhvern tíma hlotið líkamlega áverka í sambandinu.
54% sögðust hafa óttast um líf sitt í sambandinu.
42% sögðu lögreglu hafa komið á vettvang ofbeldisins í eitt eða fleiri skipti.
15% höfðu kært ofbeldið til lögreglu, meirihluti (60%) þeirra mála var enn í vinnslu en dómur hafði fallið í 5% málanna, 16% kærðra mála hafði verið verið felld niður, 5% höfðu fengið nálgunarbann og 5% neyðarhnapp.
Hér má sjá tengsl þeirra við konurnar:
Eiginmaður 26%
Sambýlismaður 13%
Kærasti 6%
Fyrrverandi eiginmaður 13%
Fyrrverandi sambýlismaður 15%
Fyrrverandi kærasti 11%
Annar 15%
