Skurðlæknirinn Tómas Guðbjartsson, einnig þekktur sem Lækna-Tómas, segist furða sig á að fólk birti mynd af sér reykjandi til stuðnings Bubba en nýlega var sígaretta fjarlægð úr munnviki Bubba á mynd sem var notuð til að auglýsa söngleikinn 9 líf um ævi tónlistarmannsins.
„Á ekki bara að tagga börnin og barnabörnin líka? Sennilega hefur þó tilgangi auglýsingastofunnar verið náð - þ.e. að vekja athygli á söngleiknum - og selja fleiri miða,“ segir Tómas í Facebook færslu um málið.
Á Facebook síðu auglýsingastofunnar Brandenburg má sjá ýmsar myndir þar sem teiknarar hafa skipt sígarettunni út fyrir ýmislegt annað. Að sögn Tómasar hefði þó verið best að skipta bara hreinlega um mynd.
Mikilvægt að „af-kúla“ reykingar hjá yngri kynslóðinni
Í færslunni segist Tómas trúa á frelsi listarinnar en að það hafi verið smekklaust að nota myndina til að auglýsa söngleikinn. „Það eru til þúsundir af flottum myndum af Bubba og algjörlega óþarfi að sýna hann reykjandi, enda löngu hættur að reykja og í dag þekktur fyrir að tengja sig við hollan lífsstíl,“ segir Tómas í færslunni.
„Reykingar eru dauðans alvara og taldar kosta íslenskt þjóðfélag allt að 80 milljörðum á ári,“ bætir hann við og greinir frá því að í 90 prósent tilfella sé hægt að rekja lungnakrabbamein, annað algengasta krabbamein á Íslandi, til reykinga.
Þá segir Tómas að það hafi skipt mestu máli að „af-kúla“ reykingar hjá yngri kynslóðinni, meðal annars í kvikmyndum og auglýsingum, og spyr hvaða skilaboð fólk sé að senda börnum og unglingum. „Auglýsingin telst klárlega ekki ólögleg. En hún er að mínu mati hallærisleg og óþörf.“
