Fangarnir eru þeir Magnús Guðmundsson, Ólafur Ólafsson og Sigurður Einarsson, sem allir hlutu þungan dóm í Al thani-málinu. Mennirnir afplána allir dóm á Kvíabryggju.
Í niðurlagi bréfi umboðsmanns til fangelsismálastjóra, sem dagsett er 31. desember, er vakin athygli á því að fangarnir segja erindi sitt varða viðkvæm mál og því óski þeir nafnleyndar eftir því sem lög eigi við í þeim efnum. Umboðsmaður skrifar í bréfi sínu að lögum samkvæmt eigi umboðsmaður að skýra stjórnvaldi frá efni kvörtunar sem tekin er til meðferðar, nema það geti torveldað rannsókn þess. Kvörtun þessi snúi að upplýsingagjöf í máli sem tilteknir einstaklingar áttu aðild að og að framgöngu fangelsismálastjóra og ummælum hans. Því sé ekki hægt að viðhafa nafnleynd um þá sem standa að kvörtuninni.
Páll Winkel, fangelsismálastjóri hefur ekki viljað tjá sig um málið, en hann hefur frest til 1. febrúar næstkomandi til að svara erindi umboðsmanns.
