Það sem máli skiptir er að sterk tiltölulega stöðug mynt sem er gjaldgeng í alþjóðaviðskiptum auðveldar mönnum að stjórna vel. Lítil óstöðug mynt sem ekki er gjaldgeng í alþjóðaviðskiptum minnkar möguleika hæfustu manna til að stjórna skynsamlega og auðveldar þeim sem lakari eru að stjórna óskynsamlega.
Þessi orð eru fengin úr nýjasta pistli Þorsteins Pálssonar á hringbraut.is þar sem hann skrifar um pólana stóru; þá sem telja að krónan hjálpi íslenskri hagstjórn og þá sem segja nýja mynt skapa landinu aukin tækifæri, en nýlega hampaði Björn Brynjúlfur Björnsson, hagfræðingur Viðskiptaráðs Íslands krónunni sem hagstjórnartæki í blaðagrein á sama tíma og Svana helen Björnsdóttir, fyrrverandi formaður Samtaka iðnaðarins skrifaði um að krónan héldi aftur af fjölgun hálaunastarfa.
Þessi reynslumikli stjórnmálamaður segir að sveiflukennd haftamynt sé ein af helstu ástæðunum fyrir lakari framleiðni á Íslandi en annars staðar. Viðskiptaráðið þurfi að svara því hvers vegna meira máli skipti að halda í ógjaldgenga mynt í alþjóðaviðskiptum en að bæta framleiðnina: \"Flest stærstu fyrirtækin í sjávarútvegi, iðnaði og ferðaþjónustu sem það geta hafa fyrir löngu nýtt lögmál markaðarins til að velja erlenda mynt í stað krónu. Engin rök standa til þess að véfengja niðurstöðu markaðslögmálsins í þessu efni. Eða er það,\" spyr Þorsteinn í pistli sínum.
Og hann er hvass í sinni grein: \"Hitt væri fróðlegt að sjá útskýrt hvers vegna sum fyrirtækin sem þetta hafa gert geta ekki hugsað sér að aðrir njóti sömu aðstöðu. Er samhljómur innan Viðskiptaráðs að viðhalda þeirri mismunun?\"
Hann segir að Viðskiptaráð hafi ekki fremur en ríkisstjórnin og Seðlabankinn sýnt fram á að unnt sé að ná þeim þremur markmiðum samtímis að hafa sjálfstæða krónu, frjáls viðskipti og stöðugleika: \"Ef halda á í krónuna þarf annað hvort að gefa frelsið eða stöðugleikann eftir. Fróðlegt væri að sjá val Viðskiptaráðs,\" skrifar Þorsteinn enn.
Því næst minnir hann á orð Svönu Helenar í grein sem hljóðar allt öðruvísi en skrif hagfræðings Viðskiptaráðs, en hann segir Svönu Helen hafa um árabil verið talsmann framsækinna þekkingarfyrirtækja: \"Framtíð þeirra byggir á útflutningi og jafnri samkeppnisstöðu við keppinauta á erlendum mörkuðum bæði um fjármagn og viðskiptavini. Það er í þessum fyrirtækjum sem möguleikarnir til framleiðniaukningar og samkeppnishæfra launa liggja einna helst,\" skrifar Þorsteinn.
Og hann minnir að lokum á val þjóðarinnar: \"Í Morgunblaðsgrein sinni bendir hún á að þótt gengisfelling geti að ákveðnu marki búið til láglaunastörf sem ella yrðu ekki til gerist það á kostnað atvinnutækifæra þar sem möguleikar eru á betri launum vegna meiri framleiðni. Þetta er auðvitað val. En framsækin þjóð hlýtur að horfa til efnahagsumhverfis sem líklegra er til að auka framleiðni og fjölga betur launuðum störfum.\"
